Футбол тарихида бир клуб билан тарих ярата олган футболчиларни кўплаб учратишимиз мумкин. Уларнинг орасида машҳур футболчилардан ташқари, сиз билмаган катта клубларда ўйнашдан бош тортиб, камтаргина клуби учун бутун ҳаётини боғлаган футболчилар мавжуд.
Саид Бей 1912 йилда Истанбулда туғилган. Футболга бўлган муҳаббат уни инглиз денгизчилари шаҳрига етаклади. Кейин эса у Усмон империясининг бошқа порти - Измирда тўхтади. Саид футбол ўйнаш учун ҳамма нарсадан воз кечди. У рақибдан тўпни тез олиб қўяр эди, шунинг учун Саид ҳимоячи позициясини эгаллади. Унинг фаолиятидаги биринчи ва ягона клуб Измир шаҳрининг “Олтинорду” жамоаси бўлди. Саид 27 йилни ушбу жамоада ўтказади ва бу жиҳатдан у жаҳонда етакчи ҳисобланади. Саид Бей клуб таркибида 44 ёшгача ўйнаб, 800 та баҳсда майдонга тушди.
Аммо 30 йилларнинг бошидан 50 йилларнинг ўрталаригача бўлган даврда турк футболининг савияси юқори эмас эди. “Олтинорду” фақат Измир футбол лигасида маҳаллий кубокларни қўлга киритган ва ҳозирда қуйи лига аутсайдери ҳисобланади. Фақат бир марта Саид бутун Туркияда энг зўри деб эътироф этилди. “Галатасарой” ва “Бешиктош” ўша пайтда энг кучли эди, аммо Измир клублари ҳийла ишлатишга қарор қилишди.
Улар учта жамоани бирлаштириб ягона жамоа сифатида мусобақага киришди. Аммо Саиднинг голларига қарамай, улар охирги ўринни эгаллашди. “Галатасарой“ афсонаси Метин Ўқтай “Олтинорду” ҳужумчисига алоҳида эътироф этди. Клуб эгалари футболчини қиммат ресторанларда кечки овқатга таклиф қилишди ва унга бўш чек тақдим этилди. Афсонага “Галатасарой” таркибига ўтиши учун хоҳлаган ойликни ёзиши мумкинлиги айтилди. Саид ҳар доим яхши таклифларни рад этиб келган. Унинг даромади баъзида нон ва зайтундан бўлак ҳеч нарсага етмаган вақтлар ҳам бўлганига қарамай, клубини тарк этмаган.
1934 йилда Туркияда "фамилия тўғрисидаги қонуни” қабул қилинганида, футболчи Саид Бей “Олтинорду” фамилиясини олди. Бошқа турк клубларининг афсоналари ҳам шундай қилишган. Юз йил ўтгач, баъзилар клуб футболчи номига номланган деб ҳам ўйлаши мумкин, аслида бунинг акси. Саиднинг фаолияти футболда камдан-кам учрайдиган садоқат намунасидир. Трансферлар қадимдан бўлиб келган. Лекин содиқ футболчилар орасида камтар турк ажралиб туради. Саид Бей буюк Мальдинига бир клубда мавсумлар бўйича жаҳон рекордини ўрнатишига имкон бермади.
Мальдини ва Тотти - энг содиқ футбол юлдузлари
Паоло ва Франческо бошқа клублардан кўп маротаба жозибали таклиф олишган. “Милан” ва “Рома” ҳар доим ҳам ёрқин жамоалар бўлишмаган, лекин италияликлар доим жамоасига содиқ қолишди. Мальдини учун бу осонроқ бўлди, чунки Паоло отасининг ортидан жамоада қолди. “Милан” айёр хўжайини Берлускони туфайли дунёнинг энг яхши жамоаларидан бири бўлган. Тоттининг ҳолати бир оз мураккаб. Футболчи “Рома” билан жуда кўп қийинчиликларга учраган, фақатгина бир мартагина Тотти севимли жамоаси билан “Скудетто”ни қўлга киритди.
Аммо Тотти голлар сони бўйича Италия “А” серияси рекордчиси ҳисобланади. У ва Мальдини 25 йил умрини футболга бағишлади. Бундан ортиқ натижага юқорида келтириб ўтган турк футболчисидан ташқари, “Клуб Франсез” жамоаси ҳужумчиси Канеле ҳам эришган. Фернанд Канеле жамоаси билан 26 йил бирга футбол ўйнаган.
Юлдузлар ҳақида гап кетганда “Сан Паулу” дарвозабони Сени ва “Ливерпуль”нинг шотландиялик ҳужумчиси Лидделани ҳам эътироф этиш зарур.
Англияда рекорд Райан Гиггзга тегишли, у “Манчестер Юнайтед” сафида 24 мавсум ҳаракат қилган. Унинг нотинч шахсий ҳаёти билан бу натижага эришгани таҳсинга лойиқ. Бу ерда “Манчестер Юнайтед”нинг бошқа бир афсонасининг гапларини эслаб ўтиш керак.
“Сиз турмуш ўртоғингиз, сиёсий ёки диний қарашларингизни ўзгартиришингиз мумкин, аммо севимли клубингизни ўзгартира олмайсиз”, — деган эди Кантона.
Бу гап унинг томонидан айтилганини тўлиқ исботлаш қийин, сабаби Кантонанинг ўзи садоқат намунаси эмас.
АПЛда клубига содиқ футболчилар қаторига Терри, Лэмпард, Жерардни киритишимиз мумкин.
Агар биз Жаҳон Чемпионлари даражасида гапирадиган бўлсак, садоқат борасида фақатгина Томас Мюллер ажралиб чиқади. Унда ўнлаб хорижий таклифлар бўлган, бироқ у ҳар сафар “Бавария” билан шартномасини узайтирган.
Ҳозир Мюнхен клуби қийин кунларни бошдан кечирмоқда ва форвард “Байер”дан мағлубиятга учраган куни жамоадошларини қаттиқ танқид қилди. Албатта, садоқат баъзида ана шундай мағлубиятларни қабул қилишга мажбур қилади.
Юқорида келтирилган футболчилар ўз клубларида фаолиятининг сўнгигача содиқ қолишди. Бу эса ёшлар учун ўрнак. Уларга катта пул ёки трофейларга эришиш имкони таклиф қилинганда ҳам улар “йўқ” дейишга ўзларида куч топишди. Тўғри, жамоасини ўзгартириб, юлдуз футболчиларга айланган спортчилар ҳам йўқ эмас. Масалан, Пеле, Месси, Роналду ёки Зидан янги жамоаларга ўтиб кўпроқ натижаларга эришган.
Шунга қарамай садоқатли футболчилар футбол тарихининг алоҳида бурчагидан ўрин эгаллашади.
Изоҳ (0)