Арманистон бош вазири Никол Пашинян Мюнхендаги хавфсизлик масалаларига бағишланган йиғилишда Ереван Украина масаласида Москвага иттифоқчи эмаслигини маълум қилди. Бу ҳақда “ТАСС” нашри хабар берди.
“Мен Украина масаласида Арманистон Россиянинг иттифоқчиси эмаслигини узоқ вақтдан бери айтиб келаман. Бу бизнинг самимий позициямиз. Афсуски, биз рўй бераётган ҳолатга таъсир эта олмаймиз. Нима бўлганда ҳам, Украина халқи бизнинг дўстимиздир”, — деган Пашинян Мюнхенда арман диаспораси билан учрашувда.
Пашинянга кўра, 1991 йилда имзоланган Олмаота декларацияси Арманистон, собиқ иттифоқ республикалари, жумладан, Россия ва Украина учун ҳам ҳудудий можарони ҳал қилишда асос вазифасини бажариши керак. Бу ҳужжат республикаларнинг чегаралари ва ҳудудий яхлитлигини тан олади. Украина масаласида ҳам худди шундай мантиқ ишлайди. Декларация қоидаларига амал қилмаслик эса Арманистон раҳбари фикрича, можаролар кучайишига, ўзаро муносабатлар совуқлашувига олиб боради.
Изоҳ (0)