Ижтимоий тармоқларда Тошкент шаҳридаги шифохоналардан бирига даволаниш мақсадида борган фуқарога сифатли тиббий хизмат кўрсатилмагани ҳақида хабар тарқалди. Соғлиқни сақлаш бошқармаси ҳолат юзасидан тушунтириш берди.
Аниқланишича, 2024 йил 4 январь куни Тошкент шаҳар Чилонзор тумани “Катта Қозиробод” МФЙда яшовчи фуқаро Г.Ю. режали имтиёзли йўлланма асосида Тошкент шаҳар тез тиббий ёрдам клиник шифохонаси кардиология бўлимига ЮИК: Зўриқиш стабил стенокардияси ФС II ташхиси билан мурожаат қилган.
Шундан сўнг бўлим мудири бемордан имтиёзли йўлланмадаги эслатмада ёзилган тиббий текширувлар (амбулатор картадан кўчирма, умумий қон ташхиси ва пешоб анализи, ЭКГ, кўкрак қафаси органлари рентген текшируви) натижасини сўраган ва унга бу режали даволаниш учун берилган йўлланма эканлигини тушунтирган.
Жорий йил 8 январь куни фуқаро Г.Ю. шошилинч кардиология бўлимига қайта мурожаат қилган ва ўзига берилган имтиёзли йўлланма асосида даволаниш учун ётқизилган. Муассасада унга белгиланган стандартлар асосида даво чоралари олиб борилган.
Изоҳ (0)