Ўзбекистонда 100 минг ишчига касб-ҳунар ва тил ўргатилиб, уюшган ҳолда чет эл корхоналарига ишга юборилади. Бу ҳақда 16 январь куни президент раислигида ўтказилган видеоселектор йиғилишида маълум қилинди.
Йиғилишда қайд этилишича, бандлик тизимига кирувчи касбга тайёрлаш муассасалари фаолияти талаб даражасида эмаслиги таъкидланди. Хусусан, ҳозирда чет элда ишлаётган ўзбекистонликларнинг аксарияти оддий ва оғир, кам иш ҳақи тўланадиган меҳнат билан шуғулланмоқда.
Европа, Осиёнинг ривожланган мамлакатлари билан жуда катта келишувлар доирасида 150 минг нафар ишчига буюртма берилган бўлса-да, бор-йўғи 9 минг ишчи юборилди.
Шу муносабат билан Ташқи меҳнат миграцияси тизимидаги ишларни лозим даражада ташкил қилиш муҳимлиги қайд этилди.
Камбағалликни қисқартириш ва бандлик вазирлиги иш ўринларини яратиш ва аҳолини касбга ўқитиш борасидаги камчиликларни бартараф этиб, 100 минг ишчига касб-ҳунар ва тил ўргатиб, уюшган ҳолда чет эл корхоналарига ишга юбориш вазифаси қўйилди.
Изоҳ (0)