“Ҳудудгазтаъминот” АЖ аҳоли ва ижтимоий соҳа истеъмолчиларини суюлтирилган газ билан таъминлаш бўйича амалга оширилаётган ишлар юзасидан маълумот берди.
Қайд этилишича, бугунги кунда “Ўзбекнефтгаз” тасарруфидаги газ ишлаб чиқариш корхоналарининг ишлаб чиқариш имкониятларидан келиб чиқиб, тақсимот асосида ажратилган ресурслар доирасида республикадаги аҳоли ва ижтимоий соҳа объектларига кундалик турмушда фойдаланиш учун суюлтирилган углеводород гази билан таъминланмоқда.
Вазирлар Маҳкамасининг 2019 йил 30 июлдаги 633-сон қарорига кўра маиший эҳтиёжлар учун истеъмолчиларга сотиладиган суюлтирилган газнинг имтиёзли нархи 1 кг учун 1120 сўм қилиб белгиланган. Бугунги кунда суюлтирилган газ таъминоти тизимининг барқарор ишлашини таъминлаш ҳамда истеъмолчиларнинг розилигига эришиш йўлида “Ҳудудгазтаъминот” томонидан барча зарур чоралар кўрилмоқда, жумладан:
Президентнинг 2020 йил 5 октябрдаги “Рақамли Ўзбекистон- 2030” стратегиясини тасдиқлаш ва уни самарали амалга ошириш чора-тадбирлари тўғрисида”ги ПФ-6079-сонли фармонида белгиланган топшириқлар асосида Жамиятимиз томонидан истеъмолчиларга суюлтирилган газни етказиб бериш ва ҳисобини юритишда автоматлаштирилган “Э-газ” дастури жорий этилди.
Республика бўйича маиший газ баллонлар орқали суюлтирилган газ билан таъминланаётган 3,7 млн истеъмолчилар махсус ID карталар таъминланди ҳамда фойдаланишдаги 4,7 миллион дона маиший газ баллонларга махсус стикерлар бириктирилди. Барча истеъмолчилар рўйхати шакллантирилиб “Э-газ” автоматлаштирилган дастурига киритилди. Ушбу дастур орқали истеъмолчиларга суюлтирилган газ етказиб бериш ҳамда электрон тўловларини амалга ошириш тизими яратилиб, электрон тўловни амалга оширишда истеъмолчи ўзига берилган ID-картасини маблағ билан тўлдириш учун республикада фаолият юритаётган электрон тўлов тизимлари Paynet, Payme, Click, Узум иловалари орқали куннинг исталган вақтида ёки банк шохобчаларига ташриф буюрган ҳолда амалга ошириш имкониятлари яратилган. Натижада, истеъмолчилар суюлтирилган газ учун тўловларни исталган тўлов тизимлари орқали амалга оширишлари ва суюлтирилган газ ҳажмлари етказиб берилгандагина ID-карталари ёрдамида тўлов қилиш имконияти яратилган бўлиб, ушбу тизимнинг жорий этилиши туфайли ҳар бир истеъмолчи томонидан суюлтирилган газдан тўғри ва самарали фойдаланиш тўғрисида тўлиқ маълумотни ўз вақтида олиш, бу эса таъминотчи ва истеъмолчи ўртасида нақд пулсиз ҳисоб-китобларни амалга ошириш, шу билан бирга тизимдаги баъзи нопок ходимлар томонидан маҳсулот нархларининг сунъий равишда оширилишининг олди олинди.
Газ баллонларини етказиб бериш муддати 35–45 кунни ташкил этади. Истеъмолчиларга қўшимча қулайлик яратиш мақсадида, маиший газ баллон ташувчи жами 840 та махсус автотранспортларга етарли даражада “айланма тара” сифатида маиший газ баллонлари билан таъминланиб, бунда истеъмолчиларнинг манзилигача бирданига тўлдирилган маиший газ баллон етказилиши, шу билан бирга етказиб бериладиган маҳсулотни вазнини ўлчаб олиш имкониятини яратиш мақсадида барча автотранспорт воситалари электрон назорат тарозиси билан жиҳозланган бўлиб, ҳар бир маҳалла фуқаролар йиғинларида маиший газ баллонларни ўлчаб кўрсатган ҳолда тарғибот ва ташвиқот ишлари олиб бориш йўлга қўйилган. Бундан ташқари олиб борилаётган ишларни маҳаллий ОАВларда ва аҳоли орасида тарғибот-ташвиқот ишлари олиб бориш жараёнларида кенг тушунтиришлар бериб борилмоқда.
“Ҳурматли истеъмолчилар, суюлтирилган газ таъминоти билан боғлиқ муаммолар ҳамда ходимларнинг ноқонуний хатти-ҳаракатлари юзага келганда истеъмолчилар тўғридан-тўғри туман газ таъминоти бўлими диспетчерлик хизмати, мурожаатларни рўйхатга олувчи 1104 (24/7) рақамли Call-марказ операторлари, жамиятнинг (71) 202-11-04 (24/7) рақамли ишонч телефони ёки Facebook ижтимоий тармоғидаги “Газ таъминоти муаммолар ва уларни ҳал этиш йўллари” гуруҳига мурожаат қилишлари, шунингдек ҳуқуқни муҳофаза қилиш идораларига мурожаат этишингиз мумкин.
Республика бўйича режалаштирилган ишларни ўз муддатида ва сифатли бажарилишини ҳамда аҳоли ва ижтимоий соҳа объектларини суюлтирилган газ билан таъминлаш, белгиланган чора-тадбирларни амалга оширилиши устидан назорат тизимини яратиш бўйича “Ҳудудгазтаъминот” акциядорлик жамияти томонидан барча чоралар кўрилмоқда”, — дейилади хабарда.
Изоҳ (0)