АҚШ президенти Жо Байден Украина президенти Владимир Зеленскийга 12 декабрь куни Оқ уйда учрашув ўтказиш ҳақида таклифнома юборди. Украина раҳбарининг офиси АҚШга ташриф 11 декабрда бошланишини маълум қилди. Бундан ташқари, Зеленский АҚШ Конгресси Вакиллар палатаси спикери, республикачи Майк Жонсон билан учрашишни режалаштирмоқда.
.avif)
Оқ уй матбуот котиби Карине Жан-Пьернинг айтишича, Америка президенти украиналик ҳамкасбига “АҚШнинг Украина халқини Россия билан можарода қўллаб-қувватлашга содиқлигини таъкидлаш учун” таклиф қилган.
“Россия Украинага қарши ракета ва дрон ҳужумларини кучайтирар экан, етакчилар Украинанинг фавқулодда эҳтиёжларини, ҳозирги ўта оғир паллада АҚШ қўллаб-қувватловининг давом этиши муҳим аҳамиятга эга эканини муҳокама қилади”, — деди Жан-Пьер хоним баёнотида.
Ўз навбатида, Украина президенти офиси Зеленский Қўшма Штатлардаги учрашувлар чоғида “Украинани қўллаб-қувватлашда АҚШ, Европа ва дунёнинг бирлигини таъминлаш”, шунингдек, “қоидаларга асосланган халқаро тартибни мустаҳкамлаш ва мамлакатлар суверенитетини ҳурмат қилиш” масалаларига эътибор қаратишини айтди.
“Вашингтонда муҳокама қилинадиган асосий мавзулар — Украина ва АҚШ ўртасидаги мудофаа соҳасидаги ҳамкорлик, хусусан, қурол-яроғ ва ҳаво ҳужумига қарши мудофаа тизимларини ишлаб чиқариш бўйича қўшма лойиҳалар, шунингдек, келаси йилда мамлакатлар ўртасидаги саъй-ҳаракатларни мувофиқлаштириш бўлади”, — дейилади офис хабарида.
Майк Жонсоннинг вакили Вакиллар палатаси спикери ва Владимир Зеленский ўртасидаги учрашув Капитолийда бўлиб ўтишини айтди, деб ёзади AFP. Республикачилар назоратидаги Қуйи палата октябрь ойидан бери Украинага ёрдам масаласида келиша олмаяпти. Жонсон Оқ уйнинг Украина, Исроил ва Тайванга ёрдам кўрсатиш ҳамда АҚШ жанубий чегарасини мустаҳкамлашни назарда тутувчи қонун лойиҳасига қарши чиқмоқда.
Айни пайтда Владимир Зеленский Аргентинада бўлиб турибди. 10 декабрь куни у Буэнос-Айресда президент Хавер Майлининг инаугурациясида иштирок этди.
Изоҳ (0)