Ўзбекистоннинг икки вилояти ва Қорақалпоғистондаги метан заправкалар фаолиятига чеклов ўрнатилди. Бу ҳақда маълумот берган масъуллар табиий газни биринчи навбатда аҳоли ва ижтимоий соҳа объектларига етказиб бериш мақсад қилингани билан изоҳлаган.
Ҳаво ҳароратининг кескин совиб кетиши туфайли табиий газни биринчи навбатда аҳоли хонадонлари, электр энергия ишлаб чиқарувчи корхоналар ҳамда ижтимоий соҳа объектлари (мактаб, боғча, шифохона ва бошқалар)га етказиб бериш чоралари кўрилмоқда. Юқоридагилардан келиб чиқиб, вилоятдаги мавжуд автомобилларга газ тўлдириш компрессор шохобчаларига табиий газни етказиб бериш жорий йилнинг 4 декабридан ҳар кунлик эрталаб соат 06:00 дан — соат 15:00 га қадар белгиланди, — дейди вилоят ҳокимлиги ахборот хизмати масъуллари берган маълумотда.
Масъуллар вилоятдаги заправкалар фаолиятида ўзгаришлар кузатилса, қўшимча маълумотлар берилишини билдирган.
Сурхондарё вилояти ҳокимлиги ахборот хизматининг хабар беришича, вилоятдаги газ заправкалари тонгги 08:00 дан соат 17:00 гача фаолият юритади. Шунингдек, Қорақалпоғистон Республикасидаги заправкалар ҳам тун-у кун режимидан соат 6:00 дан 15:00 гача ишлаш режимига ўтди.
“Дарё” журналистининг кузатувларига кўра, пойтахтдаги метан заправкаларда ҳам турнақатор навбатлар юзага келган бўлиб, тадбиркорларга куннинг маълум қисмида ишлашга рухсат берилган. Аксарият заправкалар соат 15:00 дан кейин, айримлари 17:00 дан кейин фаолият юритмаяпти. Бироқ ҳозирча масъуллар бу ҳолатни изоҳламаган.
Аввалроқ Фарғонада тез ёрдам машиналари метан газда навбат кутишга мажбур бўлгани учун масъулларга чора кўрилгани ҳақида хабар берилганди. Энергетика вазири Жўрабек Мирзамаҳмудов “Дарё” нашрига берган интервьюсида жорий йилги қиш мавсумида бензин ва метан гази етарли бўладими, деган саволга жавоб бериб, “метан заправкаларда қандайдир тақчиллик кузатилса, ўша ҳажмга тенг равишда бензинни қўшимча равишда бозорга истеъмол учун чиқарамиз”, деганди.
Изоҳ (0)