Йил охиригача Куала-Лумпур ва Тошкент ўртасида тўғридан-тўғри авиақатновлар йўлга қўйилади, деб хабар бермоқда “Дунё” АА.
Бу ҳақда Малайзиянинг йирик кундалик нашрларидан бўлган The New Straits Times газетасида қайд этилган. Унда Batik Air (собиқ Маlindo Air) лоукостер авиакомпанияси стратегик ривожланиш бўйича директори Чандран Рама Мути ушбу авиаташувчи Малайзия ва Ўзбекистон ўртасида ҳафтасига уч марта авиақатновлар амалга ошириш режалаштирилиаётгани, биринчи рейс шу йилнинг ноябрь ёки декабрь ойларида бошланишини маълум қилган.
Чандран Рама Мутининг газетаси мухбири билан суҳбатда билдиришича, Batik Air айни пайтда Тошкент халқаро аэропорти расмийлари билан музокаралар олиб бормоқда ва парвозларни бошлаш учун рухсат берилишини кутмоқда.
“Пайшанба куни Uzbekistan Airports Сингапурнинг Changi Airports International компанияси билан Тошкент халқаро аэропортини ривожлантириш бўйича ҳамкорликни йўлга қўйганлигини эълон қилди, чунки Ўзбекистонда туризм саноати жадал суръатларда ривожланмоқда”, — деган Чандран Рама Мути.
Batik Air Куала-Лумпур—Тошкент йўналишида Boing компаниясининг тор фюзеляжли B737 МАХ8 ёки Airbus'нинг кенг фюзеляжли А330 самолётларидан фойдаланиши мумкин, чунки улар 8,5 соатгача парвоз қилиши мумкин.
Айни пайтда Uzbekistan Airways ҳам Тошкент—Куала-Лумпур йўналиши бўйича парвозларни амалга оширмоқда.
Изоҳ (0)