Тошкент вилояти ҳокимининг 2 ўринбосари ва туман ҳокимига хизмат машиналари учун 1,3 миллиард сўм ажратилгани хабар қилинганди. Вилоят ҳокимлиги мазкур ҳолатга тушунтириш берди.
Хабарда айтилишича, президентнинг 2022 йил 19 декабрдаги “Электромобиллар ишлаб чиқаришни ташкил этишни давлат томонидан қўллаб-қувватлаш чора-тадбирлари тўғрисида”ги ПҚ-443-сонли қарори 8-бандига асосан, 2023-2025 йилларда давлат бошқаруви ва маҳаллий давлат ҳокимияти органлари, устав капиталида давлат улуши 50 фоиз ва ундан ортиқ бўлган корхоналар томонидан харид қилинадиган электромобиллар ва гибрид автомобиллар бўйича мақсадли кўрсаткичлар белгиланган бўлиб, унда Тошкент вилояти ҳокимлиги учун 1 миллиард 200 миллион сўмга 3 дона харид қилиниши қайд этилган.
Шу билан бирга, мазкур қарорнинг 8-бандида давлат ҳокимияти органлари томонидан сотиб олинадиган автотранспорт воситасининг энг юқори нархи бўйича ўрнатилган чекловларга электромобиллар ва гибрид автомобилларнинг бозор нархидан келиб чиқиб тегишли ўзгартиришлар киритиш мумкинлиги белгилаб қўйилган. ПҚ-443-сонли қарор ижросини таъминлаш борасида Тошкент вилояти ҳокимлигига Иқтисодиёт ва молия вазирлигининг кўрсатма хати ҳам юборилган.
Вилоят ҳокимининг икки ўринбосари ва Юқори Чирчиқ тумани ҳокимининг хизмат машиналари ўта таъмирталаб ҳолатга келгани, таъмирлашга кўп маблағ сарфланиши, эскирган автомашиналар кўп ёқилғи сарф этганини инобатга олиб ҳамда қарор ижросини таъминлаш мақсадида, Тошкент вилояти ҳокими томонидан тегишли фармойиш имзоланган.
Изоҳ (0)