Ўзбекистонда реклама тарқатишда давлат тилига доир талабларни бузганлик учун фуқаролар ва мансабдор шахсларга нисбатан маъмурий жавобгарлик белгилаш таклиф қилинмоқда. Рақобат қўмитаси бу борада Маъмурий жавобгарлик тўғрисидаги кодексга ўзгартиш киритишга доир қонун лойиҳасини ишлаб чиқди.
Қайд этилишича, Ўзбекистон ҳудудида реклама давлат тилида тарқатилиши “Реклама тўғрисида”ги қонунида қатъий белгиланган бўлсада, реклама материаларини тайёрлашда эълон қилишда, тарқатилишида давлат тилига оид қонунчилик талабларига амал қилмаслик ҳолатларини тартибга солишда муаммолар сақланиб қолмоқда.
Шу муносабат билан реклама материаларини тайёрлашда эълон қилишда, тарқатилишида давлат тилига оид талабларга амал қилмаслик учун жавобгарликни белгилаш давлат тилимизга бўлган эътиборни кучайтиришга ва муносабатларни тартибга солиш бўйича таклифлар ишлаб чиқилди.
Қўмита Маъмурий жавобгарлик тўғрисидаги кодекснинг 178-1-моддаси иккинчи қисмини “реклама тарқатишда давлат тилига доир талабларга амал қилмаганлик” деган сўзлар билан тўлдиришни таклиф қилди.
Унга кўра, фуқаролар ва мансабдор шахслар томонидан нотўғри реклама берганлик, ташқи рекламани жойлаштириш тартибига риоя қилмаганлик ёки аксилреклама беришдан бош тортганлик, давлат тилига доир талабларга амал қилмаганлик, худди шунингдек реклама қилиниши қонунчилик билан тақиқланган маҳсулотни реклама қилганлик учун БҲМнинг 5 бараваридан 7 бараваригача (1 млн 650 минг сўмдан 2 млн 310 минг сўмгача) миқдорда жарима солишга сабаб бўлади.
Ушбу қонун реклама соҳасида давлат тилига бўлган эътиборни кучайтиришга ва муносабатларни тартибга солишда ҳамда давлат тилига оид қонунбузилишларни олдини олишга хизмат қилади.
Изоҳ (0)