Ўзбекистонда автомобилнинг олд капоти ҳамда ён томон устунларига қора рангли қоплама ёпиштирганлиги натижасида ЙПХ ходимлари томонидан жарима жазоси қўлланилиб, машина вақтинча ушлаб турилгани кўплаб муҳокамаларга сабаб бўлди. Адлия вазирлиги бу қонунчилик нормаларига зид эканини билдирди.
Адлия вазирлиги мазкур ҳолатда ходимларнинг фуқарога нисбатан маъмурий жазо чораси қўллаш билан боғлиқ ҳаракатлари қонунчилик нормаларига зид ҳисоблади ва буни изоҳлаб берди.
Автотранспорт воситаларини қайта жиҳозлаш билан боғлиқ масалалар Вазирлар Маҳкамасининг 2022 йил 22 февралдаги 86-сон қарори билан тасдиқланган Махсус электрон тизим орқали рухсат этиш хусусиятига эга айрим ҳужжатларни бериш тартиб-таомиллари тўғрисида ягона низомнинг 26-иловасига мувофиқ Автотранспорт воситаларини қайта жиҳозлаш учун рухсатнома паспортида кўрсатиб ўтилган.
Конституциянинг 20 ва 55-моддаларига кўра давлат органлари томонидан инсонга нисбатан қўлланиладиган ҳуқуқий таъсир чоралари мутаносиблик принципига асосланиши ва қонунларда назарда тутилган мақсадларга эришиш учун етарли бўлиши керак. Инсон билан давлат органларининг ўзаро муносабатларида юзага келадиган қонунчиликдаги барча зиддиятлар ва ноаниқликлар инсон фойдасига талқин этилади.
Ҳар ким давлат органларининг ёхуд улар мансабдор шахсларининг қонунга хилоф қарорлари, ҳаракатлари ёки ҳаракатсизлиги туфайли етказилган зарарнинг ўрни давлат томонидан қопланиши ҳуқуқига эга.
Шунга кўра, Адлия вазирлиги келгусида юқоридаги ҳолатларни олдини олиш мақсадида 2023 йил 17 октябрда ИИВга тақдимнома киритди.
Изоҳ (0)