АҚШ давлат котиби Энтони Блинкен Иордания пойтахти Амманда Фаластин миллий маъмурияти раҳбари Маҳмуд Аббос билан учрашди, деб хабар бермоқда Фаластин ахборот агентлиги WAFA.
Учрашувда Маҳмуд Аббос Америка томонини Ғазо секторига гуманитар йўлаклар очишга чақирди, шунингдек, Исроилнинг анклав аҳолисини кўчиришга уринишларини бутунлай рад этишини маълум қилди.
“Биз барча ижтимоий хизматларнинг тўхтатилиши муносабати билан Ғазо секторида гуманитар фалокат юз беришидан огоҳлантирмоқдамиз. Ғазо секторига зудлик билан гуманитар йўлакларни очиш керак”, — деди Аббос.
Агентлик маълумотларига кўра, Маҳмуд Аббос “Фаластин халқига қарши терроризм”ни тўхтатишга ва Шарқий Қуддусдаги Ал-Ақсо масжидига ҳужумларни тўхтатишга чақирган. ҲАМАС Исроилга ҳужум қилишнинг сабабларидан бири сифатида ушбу масжид яқинида мусулмонлар, яҳудийлар ва Исроил полицияси ўртасидаги тўқнашувларни келтириб ўтган.
Бугун, 13 октябрь куни эрталаб Amnesty International инсон ҳуқуқлари ташкилоти Исроилни Ғазонинг 16 йиллик “ноқонуний ва ғайриинсоний” блокадасини бекор қилишга ва Ғазо секторида электр таъминотини тиклашга чақирди.
11 октябрь куни Ғазо секторидаги ягона электр станцияси ёқилғи тугаши сабабли ишламай қолди. Бунгача Исроил мудофаа вазири Ёав Галант 8 октябрдан Ғазо секторига электр энергиясини, 9 октябрдан эса сув таъминотини тўхтатишни буюрган эди.
12 октябрь куни АҚШ давлат котиби Энтони Блинкен Исроилга келди. Унинг ташрифидан мақсад гаровга олинганларни озод қилиш масаласини ҳал қилиш эди, улар орасида америкаликлар ҳам бор эди. Энтони Блинкен Тель-Авивдаги матбуот анжуманида Америка бор экан, Исроил ҳеч қачон ёлғиз қолмаслигига ваъда берди.
Изоҳ (0)