ҲАМАС Исроилнинг Ғазо шимолидаги аҳолини жанубга эвакуация қилиш ҳақидаги талабини “психологик уруш” деб атади. Гуруҳ расмийлари ғазоликлардан уйларини тарк этмасликни сўради, деб хабар бермоқда CNN.
ҲАМАС баёнотида айтилишича, “босқинчилар фуқаролар ўртасида саросима уйғотиб, ички фронт барқарорлигига путур етказиш мақсадида турли йўллар билан ёлғон тарғиботни ёйиш ва кўпайтиришга ҳаракат қилмоқда”.
“Бизда иккита йўл бор: бу ишғол устидан ғалаба қозониш ёки ўз уйимизда ўлиш. Биз кетмоқчи эмасмиз. Накбани такрорлашга тайёр эмасмиз”, — деди ҲАМАСнинг сиёсий ва халқаро алоқалар бюроси раҳбари Бассем Наим.
Накба (арабча “фалокат”) — 1948 йилдаги араб-исроил урушидан кейин камида ярим миллион фаластинлик арабларнинг оммавий сургун қилиниши.
ҲАМАС “халқаро институтлар” ходимлари минтақанинг шимолий қисмини тарк этмаганини айтди. Бироқ БМТнинг Яқин Шарқдаги фаластинлик қочқинларга ёрдам агентлиги (UNRWA) ташкилот ходимлари Ғазо секторининг жанубига кўчирилгани ҳақида хабар берди.
Al-Jazeera хабар беришича, Ғазо сектори шимолидаги кўчалар ҳувиллаб қолган, фақат тез ёрдам машиналари ўтиб туради. Маҳаллий аҳолининг телеканалга маълум қилишича, интернет тармоғига уланишдаги узилишлар ва телефон тармоқларининг бузилиши туфайли аҳоли тўлиқ маълумот ололмаяпти ва аксарият ғазоликлар Исроил армиясининг эвакуация ҳақидаги талабидан ҳанузгача бехабар.
Ғазо секторининг жанубида қочқинларни жойлаштириш билан боғлиқ вазият оғир, деб ёзади Al-Jazeera: БМТ назоратидаги мактаблар тўлиб кетган, у ерда бепул бошпана ва эвакуация учун транспорт қолмаган.
13 октябрь куни эрталаб Исроил мудофаа кучлари Ғазо фуқароларига шаҳар шимолини тарк этишни буюргани ҳақида хабар берилди. БМТ ушбу буйруқни бекор қилишга чақириб, гап бир миллиондан ортиқ одамни кўчириш ҳақида кетаётганини таъкидлади.
Изоҳ (0)