Ўзбекистондаги 4 та вилоятда ёшларнинг экология ва фермерлик борасидаги билимларини оширувчи махсус ўқув марказ ташкил этилади

Ўзбекистоннинг тўртта вилоятида ёшларнинг экология ва фермерликка қизиқиши борасидаги билимларини орттиришга хизмат қилувчи махсус ўқув марказлари ташкил этилади. Бу ҳақда “Дарё”га Ўзбекистон Ёшлар иттифоқи раиси Темурбек Поёнов хабар берди. 

Поёновнинг маълумот беришича, мазкур ўқув марказлари Германия ҳамкорлигида ташкил этилади. 

Ташкилот ахборот хизматининг “Дарё”га қўшимча қилишича, бугун Германиянинг German Sparkassenstiftung ташкилоти ҳамда Ўзбекистон Ёшлар иттифоқи раҳбарияти учрашуви бўлиб ўтган. 

Учрашувда Ўзбекистон ёшлар иттифоқи Марказий Кенгаши раҳбарияти ҳамда German Sparkassenstiftung ташкилотининг бош офиси Марказий Осиё лойиҳаси раҳбари Инка Рюк ва бошқа ташкилот аъзолари иштирок этишди. Учрашув давомида бир қатор истиқболли лойиҳалар юзасидан ўзаро ҳамкорликда ишларни амалга ошириш масалалари кўриб чиқилди.

Хусусан, ташкилотимизнинг узоқ йиллик ҳамкори ҳисобланган German Sparkassenstiftung ташкилоти билан биргаликда ёшларнинг экология ва фермерликка бўлган қизиқишларини қўллаб-қувватлаш мақсадида жорий йил якунига қадар тўртта вилоятда махсус ўқув марказларини ташкил этишга келишилди, — дейилади ташкилот ахборот хизмати хабарида. 

Қўшимча қилинишича, ўқув марказлари республиканинг Бухоро, Қашқадарё, Наманган ҳамда Хоразм вилоятларида ташкил этилиб, дарс жараёнлари халқаро мутахассислар иштирокида барча зарурий шароитларга эга замонавий дарс хоналарида ўтилади.

Учрашув давомида бошқа қатор масалалар муҳокама қилинди ҳамда ҳамкорликда амалга ошириладиган келгусидаги режалар белгиланди, — дейди Темур Поёнов.

German Sparkassenstiftung (Германия жамғарма кассалари фонди) 1992 йилда ташкил этилган бўлиб, Германия молиявий гуруҳининг бир бўлаги ва мамлакатдаги мавжуд тахминан 370 та Sparkассе (яъни давлатга ҳам хусусий секторга ҳам тегишли бўлмаган, ҳудудий характер касб этган банк) нинг тажрибалари ва ютуқларини дунё бўйлаб оммалаштирувчи ташкилот ҳисобланади. Ташкилот ҳозирги кунда дунёнинг 50 дан ортиқ мамлакатларида турли лойиҳаларни амалга оширмоқда. Ўзбекистонда 2003 йил фаолиятини бошлаган ушбу тузилма дастлаб Халқ банки, кейинчалик Ўзбекистон Республикаси Марказий банки, Хотин-қизлар қўмитаси ва бошқа бир қатор давлат ҳамда нодавлат ташкилотлари билан турли лойиҳаларни амалга ошириб келмоқда.