Машҳурларнинг ҳаётида уларни дунёга келтирган, биринчи қадамларини қўйишга ва ҳаётда ўзини топишга ёрдам берган жуда муҳим шахс бор. Тахмин қилганингиздек, уларнинг оналари ҳақида маълумот берамиз.
Ирмелин Инденбиркен — Леонардо Ди Каприо
Лео Лос-Анжелесда — комикслар ёзувчи Жорж Ди Каприо ва суд котибаси Ирмелин Инденбиркен оиласида туғилган. Унинг ота-онаси Лео атиги бир ёшга тўлганда ажрашишади ва болакай онасида қолади.
Биз худди “Таксичи” фильмидагидек яшаганмиз: кўчамизда ҳар куни жиноятлар ва зўравонликлар содир бўларди, деб эслайди Лео болалигини.
Бўлажак юлдузнинг онаси ўғли билан бу жойлардан кетиш учун бир нечта ишларда ишлаган. Леонинг истеъдодини эрта пайқаган Ирмелин унинг ривожланишига бор кучи билан ҳаракат қилади. Шунинг учун у жуда банд бўлишига қарамай, ўғлини кастингларга ва ҳар хил танловларга олиб боришга вақт топади. У бутун умри давомида ўзида йўқ нарсани ўғлига беришга интилади.
Лео актёрлик карьерасига эътибор қаратиш ва кўпроқ пул топиш учун мактабни ташлашга қарор қилганида, Ирмелин узоқ вақт қаршилик кўрсатади, лекин ўғли қатъий туриб олади. Актёр онасидан ўғлига ўзи бўлиб қолиш имкониятини бергани учун жуда миннатдор. Ди Каприони фаолиятининг бошида қўллаб-қувватлаган ҳам онаси эди. Ирмелин унинг танлаган касбини ҳурмат қилди ва ўғлининг истеъдодига ишончини йўқотмади. Актёрнинг сўзларига кўра, онаси бўлмаганда у ҳеч қачон бундай муваффақиятларга эришмаган бўларди.
Лео онасига жуда яқин — биргаликда улар тез-тез ижтимоий тадбирларда, шунингдек, “Оскар” маросимларида қатнашади. 2023 йилда Ирмелин 80 ёшини нишонлайди. Ёши катта бўлишига қарамай, у ҳали ҳам ажойиб кўринади. У фақат бир нарсадан — неваралари йўқлигидан афсусланади.
Мария Долореш душ Сантуш Авейру — Криштиану Роналду
Португалиялик футболчи Криштиану Роналду ошпаз Мария Долореш душ Сантуш Авейру ва боғбон Хосе Динис Авейру оиласида тўртинчи фарзанд бўлиб туғилган. Болага Криштиану исмини холаси қўяди. Унга берилган иккинчи исм — Роналдо, отаси томонидан Роналд Рейган шарафига танланган, чунки у ўша пайтда ҳокимиятда бўлган Америка президентининг мухлиси эди. Хосе алкоголизм билан боғлиқ муаммолар туфайли эрта вафот этади. Фарзандларини боқиб катта қилиш ёлғиз онанинг елкасига тушади.
Онаси тўрт фарзандини боқиш учун кеча-ю кундуз ишларди. Криштиану акаларининг кийимларини кийиб катта бўлади, уларнинг ягона ўйинчоғи эса копток эди. Бўлажак чемпион 3 ёшидан футбол ўйнай бошлаган.
Ҳозирда Мария Долорес душ Сантуш 68 ёшда. Роналду ҳар доим унинг ютуқларида онасининг таъсири катта эканлигини таъкидлаб келади. Ҳар сафар мағлубиятдан сўнг, Мария Долорес ўғлини қўллаб-қувватлаган ва уни таслим бўлмасликка ундаган.
“Ўғлим жуда кучли характерга эга, жуда мағрур йигит ва ҳар доим кўпроқ нарсага интилади. Баъзан бу унинг камчилиги ҳамдир”, — дейди ўғлининг асосий мухлиси ва илҳомлантирувчиси.
Шунингдек, онаси невараларини тарбиялашда ёрдам беради. Роналдунинг ҳозирда беш нафар фарзанди бор: 12 ёшли Криштиану; беш ёшли Матео ва Эва, испаниялик модел Жоржина Родригеснинг икки қизи — 4 ёшли Алана Мартина ва 10 ойлик Белла Эсмералда.
Констанс Лето — Жаред Лето
Жаред санъатга бўлган иштиёқи учун онаси Констансдан қарздор, онаси уни ва акаси Шеннонни доим қўллаб-қувватлаган. Отаси улар ёшлигида онаси билан ажрашган. Кейинчалик онаси иккинчи бор турмуш қуради, аммо тез орада иккинчи эри Карл Лето билан ҳам ажрашади.
Констанс икки ажойиб истеъдодли ўғили — Жаред ва Шеннонни бир ўзи тарбиялади, ўғиллари улғайиб, “30 Seconds to Mars” рок гуруҳининг аъзоси бўлишади. Уларнинг онаси актёрлик, мусиқа ва санъатга бўлган иштиёқини доим қўллаб-қувватлайди. У бошқа оила аъзоларининг кўндиришига қарамай, мусиқачи бўлишни орзу қилган кенжа ўғлини ҳарбий билим юртига беришни қатъиян рад этади. Жаред 12 ёшида ҳарбий машғулотлар ўрнига Виржиния штатидаги кичик ошхонада идиш-товоқ ювувчи бўлиб ишлаган, 16 ёшида эса меҳмонхонада эшикбон бўлиб ишлаган.
2014 йилда “Далласлик харидорлар клуби” фильмидаги роли учун “Оскар”ни қабул қилиш чоғида Лето саҳнада таъсирчан нутқ сўзлайди:
“1971 йилда Луизиана штатининг Боссер шаҳрида бир ўсмир қиз яшарди. У ўрта мактаб ўқувчиси ва ёлғиз она эди — у ўғилларини хурсанд қилиш учун ҳамма нарсага тайёр эди. У фарзандларининг ижодини рағбатлантириб, меҳнат қилишга ўргатди. Бу аёл менинг онам. Ойи, мен сизни яхши кўраман”.
Бугун Констанс 71 ёшда бўлса ҳам жуда ёш кўринади.
Жейн Этта Питт — Бред Питт
Жейн Этта Питтнинг Бреддан ташқари яна бир ўғли ва қизи бор. У бутун умри давомида маҳаллий мактабда аввал ўқитувчи, кейинроқ маслаҳатчи психолог бўлиб ишлаган. Аёл Оклахома Баптист университетини тамомлаган.
Жейн ҳар доим ўғлига ёрдам берган ва унинг ҳар қандай қарорини қўллаб-қувватлаган. ўғлининг Анжелина Жоли билан учраша бошлагани ҳақидаги хабар дастлаб аёлни ҳайратда қолдирган, чунки у ва унинг эри ҳар доим меросхўрларини қатъий равишда диндор қилиб тарбиялашган. Жоли актёрлар оиласида ўсган ва ҳеч қандай чекловларни билмас эди: унинг ёшлиги қанчалик нотинч бўлганини ҳамма эслайди. Бундан ташқари, Бреднинг онаси ўғлининг сэвимли келини Женнифер Энистон билан ажрашганини ҳали қабул қилолмаганди.
Аммо Бред онасининг сўзларига қулоқ солмайди, натижада турмуш қурганидан 12 йил ўтиб Жоли билан ажрашади. Онаси имкон қадар Питтга яқин бўлишга ҳаракат қилади.
“У Бреднинг азобланишини кўришга чидай олмайди”, дейди оиланинг яқин дўстлари.
Яқинда Голливуд юлдузи онаси Жейн Эттага Анжелина Жоли билан узоқ ва қийин ажралиш жараёнида руҳан ёрдам бергани ва собиқ хотинининг фарзандлари билан мулоқотини чеклашга урининганида унга далда бериб тургани учун таъсирчан миннатдорлик билдирди. Онаси ўғлининг Женнифер Энистон билан қайта турмуш қуришини орзу қилади. Балки Питт ҳам намунали ўғилдек, бу сафар унга қулоқ солар...
Жаклин Сталлоне — Силвестр Сталлоне
Силвестр Сталлоненинг онаси Жаклин Жеки Лейбофиш — америкалик жамоат арбоби, ёзувчи, мунажжим ва актриса.
Ўғли 11 ёшга тўлганда, ота-онаси ажрашишади — отаси ўғлини 15 ёшгача ўзи тарбиялайди. Слай (Силвестернинг тахаллуси) тарбияси оғир бола бўлган, 11 йил давомида у ўзининг хатти-ҳаракати, оқсоқланиши ва академик кўрсаткичлари туфайли 14 та мактаб ўзгартиради. Слайнинг ўзи ҳам болалик ва ўсмирлик даврини даҳшатли фильм сифатида эслайди. Вазиятнинг умидсизлиги унинг ташқи кўриниши билан янада оғирлашади. Туғилганда акушернинг бепарволиги туфайли Слайнинг юзидаги асаб толалари шикастланади — юзининг бир қисми фалаж бўлиб қолади.
Онаси ўғлини эридан олиб, Филаделфияга муаммоли ўсмирлар учун ихтисослаштирилган мактабга юборади. Силвестер у ерда спорт билан фаол шуғулланган ва ҳатто тэатр томошаларида қатнашган. Кейинчалик у ўғлини Швейцариядаги нуфузли коллежга жисмоний тарбия ўқитувчиси сифатида ишга жойлаштиради, Бўлажак актёр у ерда ярим кунлик мураббий сифатида ишлайди ва талабалар театрида қатнашади. Ўғлидаги иштиёқни кўрган онаси Слайни Майами университетининг драма факультетида актёрлик касбини олишга ундайди. Ҳатто ўқиш пайтида ўқитувчилар бир овоздан Слайнинг заррача истеъдоди йўқлиги ва актёр бўллмаслигига ишонтиришса-да, она ўғлини доим қўллаб-қувватлайди.
Силвестр қувноқ ва кўп қиррали онасини яхши кўради ва уни кўпинча ижтимоий тадбирларга олиб боради.
“Менинг онам дунёдаги энг зўр она! Фарзандларим ва мен уни жуда яхши кўрамиз ва ҳурмат қиламиз”, — дейди актёр ҳаётлигидаги энг яқин одами ҳақида гапириб.
Изоҳ (0)