Бухоро вилояти Когон туманида 26 миллиард сўмлик газни ўғирлаган “Ҳудудгаз Бухоро”нинг икки мансабдори қамалди. Бу ҳақда вилоят прокуратураси ахборот хизмати хабар берди.
Унга кўра, Жиноят ишлари бўйича Когон туман суди томонидан судланувчилар А.Жабборов, Ж.Султонов, М.Ҳайитов ва А.Абдуллаевларга оид жиноят иши кўрилди. Судланувчилар М.Ҳайитов ва А.Абдуллаевлар “Дилдора” МЧЖ раҳбари А.Жабборов ҳамда “Осиё Бухоро газ” МЧЖ раҳбари Ж.Султонов билан тил бириктириб, энергоресурсларни ўғирлаш жиноятларини содир этди.
Хусусан, М.Ҳайитов 2022 йил 15 августдан “Ҳудудгазтаъминот” АЖнинг “Ҳудудгаз Бухоро” газ таъминот филиали метрология хизмати бошлиғи вазифасида, А.Абдуллаев метрология хизмати етакчи муҳандиси вазифасида ишлаб келиб, мансаб ваколатларидан қасддан фойдаланган. Жамият раҳбарлари А.Жаббаров ва Ж.Султоновлар билан олдиндан жиноий тил бириктириб, жамиятга қарашли газ қуйиш шохобчаларига келган алоҳида табиий газ қувурининг уланиш нуқтасига ўрнатилган “Автопилот-PRО” русумли газ ҳисоблаш ускунаси ўрнатилган хонанинг эшигининг тамғаланишини таъминламаган. Газ ҳисоблагич ускунасидаги мавжуд имплюс трубкаси тамғасини газ маҳсулотлари қувурларида ўғирлик қилиш мақсадида ҳеч қандай ҳужжатсиз алмаштирилган.
Натижада “Ҳудудгазтаъминот” акциядорлик жамиятининг жами 26,1 миллиард сўмлик жуда кўп миқдордаги табиий газни ўғирлаб яширин равишда талон-торож қилган. Жиноят ишлари бўйича Когон туман судининг ҳукмига кўра, Жиноят кодексининг 169-моддаси 4 -қисмининг “а” банди, 209-моддаси 2-қисмининг “а” банди, 228-моддаси 2-қисмининг “а,б” бандлари билан айбли деб топилган А.Жабборов, Ж.Султоновлар 11 йил, А.Абдуллаев ва М.Ҳайитовлар 9 йилга озодликдан маҳрум этилди.
Шунингдек, айбланувчилар томонидан 6 миллиард сўм зарар қоплангани сабабли, қолган 20,1 миллиард сўм зарар судланувчилардан солидар тартибда ундирилиши белгиланди.
Изоҳ (0)