Фарғона вилоят Экология бошқармаси Қўқон шаҳрида икки туп дарахт ноқонуний равишда кесилгани айтилган хабарларга муносабат билдирди.
Ижтимоий тармоқларда Қўқон шаҳар “Олтин водий” МФЙ Мовароуннаҳр кўчасидаги яшил майдон йўқ қилиниб, мораторий талабларига зид равишда қасддан икки туп шумтол кесилгани тўғрисида хабар тарқалди.
Фарғона вилоят Экология, атроф-муҳитни муҳофаза қилиш ва иқлим ўзгариши бошқармаси Қўқон шаҳар инспекцияси давлат инспекторлари томонидан мазкур хабарда келтирилган қонунбузарлик ҳолатлари бўйича тезкорлик билан жойида ўрганиш ишларини олиб борган. Ўрганишлар давомида ҳақиқатда “Олтин водий” МФЙнинг А.Т.Хўқандий мавзеси ҳудудида икки туп дарахтни қурилиш ишлари амалга ошириш жараёнида остидан кесиб, илдиз қисмлари билан кўчириб ташлаганлик ҳолати аниқланган.
Бу билан “Ўсимлик дунёсини муҳофаза қилиш ва ундан фойдаланиш тўғрисида”ги қонуннинг 37-моддаси 2-қисми талаблари қўпол равишда бузилган бўлиб, президентнинг 2021 йил 30 декабрдаги ПФ-46-сонли фармонига асосан дарахтларни кесиш учун рухсат бериш муддатсиз даврга мораторий белгилаб қўйилган фармон талабларига амал қилинмаган.
Мазкур ҳолатга кўра ҳуқуқбузар К.А.га нисбатан ўсимлик дунёсига етказилган 184 миллион 800 минг сўм зарар ҳисобланиб, ҳозирда расмийлаштирилган ҳужжатлар Қўқон шаҳар прокуратурасига тақдим этилган.
Ноқонуний дарахт кесиш ҳолатлари
Бир неча кун олдин Хоразмда ўзини тадбиркор деб таништирган шахслар истироҳат боғидаги дарахтларни кесиб ташлаганди. Бухорода 22 туп қарағай ноқонуний кесилиб, табиатга 144,3 миллион сўмлик зиён етказилганди. Фарғонадаги чегара пости яқинида 12 туп манзарали дарахт қўпориб ташлангани хабар қилинганди.
Изоҳ (0)