Yevroparlament Aleksandr Lukashenko rejimining Rossiyaning Ukrainaga qarshi “asossiz va noqonuniy” harbiy agressiyasidagi ishtirokini qoralovchi rezolyutsiyani qabul qildi.
Hujjatda aytilishicha, Belarus hukumati “nafrat so‘zlari, Moskva ritorikalariga mos keladigan dezinformatsiya va propagandani” qo‘llab-quvvatlamoqda, shuningdek, rus qo‘shinlarini o‘q-dorilar va jihozlar bilan ta’minlamoqda, ular va “Vagner” yollanma askarlariga o‘z hududidan harbiy tayanch bermoqda.
Bundan tashqari, Yevropa parlamenti Lukashenkoni Ukrainaning Rossiya tomonidan bosib olingan hududlaridan 2 150 nafar bola, jumladan, yetim bolalarning Belarusdagi sog‘lomlashtirish lagerlariga noqonuniy olib ketilishi va ularni “ruslashtirish”da ishtirok etgan deb topdi.
Deputatlarning fikricha, Aleksandr Lukashenko va Belarus hukumatining ukrainalik bolalarni majburan deportatsiya qilish bo‘yicha harakatlarini insoniyatga qarshi jinoyat, deb bo‘ladi.
“Yevropa parlamenti Lukashenkoni Vladimir Putin va Mariya Lvova-Belova kabi harbiy jinoyatlar uchun javobgar deb hisoblaydi va shu sababli Xalqaro jinoiy sudni Lukashenkoni hibsga olish uchun xalqaro order berish masalasini ko‘rib chiqishga chaqiradi”, — deyiladi hujjatda.
Eslatib o‘tamiz, 17-mart kuni Gaagadagi Xalqaro jinoiy sud Rossiya prezidenti Vladimir Putin va Rossiyadagi bolalar huquqlari bo‘yicha komissari Mariya Lvova-Belovani hibsga olishga order berdi. Ular Ukrainaning bosib olingan hududlaridan bolalarni Rossiyaga noqonuniy ravishda deportatsiya qilishda gumon qilinmoqda, bu urush jinoyati hisoblanadi.
Izoh (0)