Қора ва Ўрта Ер денгизидаги сув тошқини ҳамда кучли бўронлар нафақат Туркия, балки Греция ва Болгария учун ҳам ҳалокатли оқибатларга олиб келди. Айрим дам олиш масканларини сув босди, тошқин хавфи туфайли сайёҳлар юқори қаватларга чиқишга чақирилди. Грециянинг Скиатос оролида бўронлар ва кучли ёмғирлар туфайли сайёҳлар самолётларнинг қўниши фонида суратга тушишни яхши кўрадиган машҳур аэропорт ёпилди, Болгарияда эса бир неча юзлаб сайёҳлар эвакуация қилинди.
Греция метеорология хизмати 5 сентябрь куни кечқурун Пелион ҳудудидаги қишлоқда 75,4 сантиметр ёмғир ёғганини, бу камида 2006 йилдан бери қайд этилган энг юқори даража эканини маълум қилди.
Греция матбуоти хабарига кўра, полиция Волос шаҳрида, яқин атрофдаги Пелион тоғли минтақасида, шунингдек, Скиатос курорт оролида транспорт ҳаракатини тақиқлаган. Ушбу ҳудудларда рекорд даражадаги ёмғирлар камида бир кишининг ўлимига сабаб бўлди: у устига қулаган ҳимоя девори остида вафот этди. Яна беш киши бедарак йўқолганлар рўйхатида: уларни сув оқимлари олиб кетган бўлиши мумкин.
Кўчаларни сел босиб, машиналарни ювиб кетган. Бундан ташқари, тошлар юмалаб тушиши оқибатида йўллар тўсиб қўйилган, кўплаб ҳудудларда электр энергияси узилиб қолган.
Скиатос курорт оролида сув тошқини туфайли “самолётлар аэропортга яқинлаша олмаяпти”.
Болгариядаги сайёҳлар ҳам қийинчиликка дуч келмоқда: мамлакатда ёғингарчиликнинг асосий қисми Сарево курортига ёғди.
Соҳил бўйлаб дам олаётган юзлаб сайёҳларни эвакуация қилишга тўғри келди, қолган курорт маъмурлари пастки қаватдагилардан юқорига чиқишни талаб қилди.
Қурбонлар ҳам бор: бош вазир Николай Денков айтишича, икки киши ҳалок бўлган, уч киши бедарак йўқолган. Улар орасида сайёҳлар бор-йўқлиги ҳақида маълумот берилмаган. Маҳаллий матбуотнинг қўшимча қилишича, сув тошқинларининг ҳалокатли оқибатларига нафақат иқлим ўзгариши, балки талабга жавоб бермайдиган инфратузилма ҳам сабаб бўлган.
Изоҳ (0)