Футбол бўйича Ўзбекистон Суперкубоги баҳсида “Пахтакор” ва “Насаф” жамоалари ўзаро тўқнаш келади. Учрашувдан олдин иккала жамоа мураббийлари ўз фикрлари билан бўлишди.
“Пахтакор” жамоаси бош мураббийи Максим Шацких:
Эртага ўйин қизиқ бўлиши аниқ. Биз чиройлироқ футбол ўйнаш учун бор салоҳиятимизни ишга соламиз. Умид қиламанки, ўйин мухлисларга ёқади. Мухлисларни стадионда кутиб қоламиз ва биз майдонда чиройли футбол намойиш этамиз. Натижани эса ўйиндан кейин билиб оламиз.
Ҳар бир соврин футболчи ва мураббийлар учун жуда муҳим. Соврин тарихда қолади ва ушбу совринни қўлга киритиш учун бор кучимизни ишга соламиз. Эртага Суперкубок финали ва ушбу совринни ҳеч ким рақибга бериб юборишни хоҳламайди. Эртага сифатли ўйин ва ўзимиз истаган натижага эришамиз деган умиддаман.
Ўз режамни айтиб қўйишим мантиққа тўғри келмайди. Таркибни ўйиндан аввал аниқлайман. Чемпионат ва кубок баҳсларини солиштириш нотўғри деб ўйлайман. Чемпионат узоқ вақт давом этадиган мусобақа, кубок баҳслари эса хатони кечирмайди ва бор-йўғи бир ўйин ўтказилади. Ўйинга тайёргарлик ҳам бошқача бўлади. Эртага “Пахтакор” намойиш этадиган ўйин бир ҳафта олдинги ўйиндан фарқ қилади.
“Насаф” бош мураббийи Рўзиқул Бердиев:
Эртанги ўйинда фаворит йўқ деб ҳисоблайман. Иккала жамоа ҳам бор кучини ишга солиши аниқ. Фақат вазиятлардан унумли фойдаланиш муаммоси панд бермайди деган умиддаман. Бош мақсадимиз бир - яна битта совринни қўлга киритиш.
Ҳозир икки клубни ҳам бир хил даражада дейиш мумкин. Чемпионат ҳамда Кубок баҳслари, шунингдек, халқаро майдонда ҳам бизни қийин баҳслар кутиб турибди. Ҳар бир мусобақага бир хил кучни ташлаш учун максимал ишлаймиз. Ўз кучимизга ишонч юқори. Бу принципиал баҳс. Кучли жамоа ғалаба қозонади. Албатта, ўша клуб биз бўламиз.
Истеъфо ҳар бир мураббийнинг тақдирида бор нарса. Эртами-кечми бу содир бўлади. Лекин менинг бугун бу ҳақда ўйлашга ҳаққим йўқ. Қачон ишдан кетишимдан қатъи назар, мавсум олдидаги режаларни бажаришга катта урғу бераман. Нима бўлган тақдирда ҳам қилган ишимдан фахрланаман. Ҳаммасини "Насаф" ва унинг содиқ мухлислари учун қилганман.
Натижа, бу соврин ҳозир ҳаммага муҳим. Тактик юришлар кучли бўлади деб ўйлаяпман. Кичик деталларга ҳам эътибор бериш талаб этилади. Зеро, аввалги баҳсларда бўлгани каби бу ҳам оёқдан чалиб қолмаслиги зарур. Чунки ҳар икки жамоа бир-бирини жуда яхши билади.
Ҳужумчи муаммоси ўтган йил ҳам кузатиларди. Бироқ энди, Норчаев кетгач бу муаммо яна ҳам кескинлашиб кетди. Янги ҳужумчилар олдик. Муаммони ечиш мақсадида легионерларга суяндик. Машғулотларда ишламоқдамиз. Шунга қарамай муаммонинг ўзгариши қийин бўляпти.
Эслатиб ўтамиз, “Пахтакор” ҳамда “Насаф” жамоалари ўртасидаги Суперкубок баҳси “Сўғдиёна” марказий стадионида соат 19:30 да старт олади.
Изоҳ (0)