Futbol bo‘yicha O‘zbekiston Superkubogi bahsida “Paxtakor” va “Nasaf” jamoalari o‘zaro to‘qnash keladi. Uchrashuvdan oldin ikkala jamoa murabbiylari o‘z fikrlari bilan bo‘lishdi.
“Paxtakor” jamoasi bosh murabbiyi Maksim Shatskix:
Ertaga o‘yin qiziq bo‘lishi aniq. Biz chiroyliroq futbol o‘ynash uchun bor salohiyatimizni ishga solamiz. Umid qilamanki, o‘yin muxlislarga yoqadi. Muxlislarni stadionda kutib qolamiz va biz maydonda chiroyli futbol namoyish etamiz. Natijani esa o‘yindan keyin bilib olamiz.
Har bir sovrin futbolchi va murabbiylar uchun juda muhim. Sovrin tarixda qoladi va ushbu sovrinni qo‘lga kiritish uchun bor kuchimizni ishga solamiz. Ertaga Superkubok finali va ushbu sovrinni hech kim raqibga berib yuborishni xohlamaydi. Ertaga sifatli o‘yin va o‘zimiz istagan natijaga erishamiz degan umiddaman.
O‘z rejamni aytib qo‘yishim mantiqqa to‘g‘ri kelmaydi. Tarkibni o‘yindan avval aniqlayman. Chempionat va kubok bahslarini solishtirish noto‘g‘ri deb o‘ylayman. Chempionat uzoq vaqt davom etadigan musobaqa, kubok bahslari esa xatoni kechirmaydi va bor-yo‘g‘i bir o‘yin o‘tkaziladi. O‘yinga tayyorgarlik ham boshqacha bo‘ladi. Ertaga “Paxtakor” namoyish etadigan o‘yin bir hafta oldingi o‘yindan farq qiladi.
“Nasaf” bosh murabbiyi Ro‘ziqul Berdiyev:
Ertangi o‘yinda favorit yo‘q deb hisoblayman. Ikkala jamoa ham bor kuchini ishga solishi aniq. Faqat vaziyatlardan unumli foydalanish muammosi pand bermaydi degan umiddaman. Bosh maqsadimiz bir - yana bitta sovrinni qo‘lga kiritish.
Hozir ikki klubni ham bir xil darajada deyish mumkin. Chempionat hamda Kubok bahslari, shuningdek, xalqaro maydonda ham bizni qiyin bahslar kutib turibdi. Har bir musobaqaga bir xil kuchni tashlash uchun maksimal ishlaymiz. O‘z kuchimizga ishonch yuqori. Bu prinsipial bahs. Kuchli jamoa g‘alaba qozonadi. Albatta, o‘sha klub biz bo‘lamiz.
Iste’fo har bir murabbiyning taqdirida bor narsa. Ertami-kechmi bu sodir bo‘ladi. Lekin mening bugun bu haqda o‘ylashga haqqim yo‘q. Qachon ishdan ketishimdan qat’i nazar, mavsum oldidagi rejalarni bajarishga katta urg‘u beraman. Nima bo‘lgan taqdirda ham qilgan ishimdan faxrlanaman. Hammasini "Nasaf" va uning sodiq muxlislari uchun qilganman.
Natija, bu sovrin hozir hammaga muhim. Taktik yurishlar kuchli bo‘ladi deb o‘ylayapman. Kichik detallarga ham e’tibor berish talab etiladi. Zero, avvalgi bahslarda bo‘lgani kabi bu ham oyoqdan chalib qolmasligi zarur. Chunki har ikki jamoa bir-birini juda yaxshi biladi.
Hujumchi muammosi o‘tgan yil ham kuzatilardi. Biroq endi, Norchayev ketgach bu muammo yana ham keskinlashib ketdi. Yangi hujumchilar oldik. Muammoni yechish maqsadida legionerlarga suyandik. Mashg‘ulotlarda ishlamoqdamiz. Shunga qaramay muammoning o‘zgarishi qiyin bo‘lyapti.
Eslatib o‘tamiz, “Paxtakor” hamda “Nasaf” jamoalari o‘rtasidagi Superkubok bahsi “So‘g‘diyona” markaziy stadionida soat 19:30 da start oladi.
Izoh (0)