Қирғизистоннинг “Манас” аэропортида 27 ёшли чечен фаоли Мансур Мовлаев қўлга олинди. Бу ҳақда AKIpress хабар берди.
Мовлаев Миллий хавфсизлик давлат қўмитаси тергов изоляторининг вақтинчалик сақлаш изоляторига жойлаштирилган. Ҳуқуқ фаоли Толекан Исмоилова чечен фаоли “Россиядаги қийноқлар қурбони” эканини билдирди.
Мовлаев Чеченистон раҳбари Рамзан Қодировни танқид қилган, инсон ҳуқуқлари бузилиши ва сиёсий репрессияларга қарши чиққан.
У ўз баёнотларида сўз эркинлигининг бузилиши, ҳуқуқ-тартибот идораларининг ўзбошимчаликлари ва мамлакатдаги бошқа муаммоларга оид саволларни ўртага ташлаган.
Мовлаев 2020 йилда 3 йиллик қамоқ жазосига ҳукм қилинган. Мухолифатга кўра, унга қарши иш уйдирма бўлган. 2022 йилда у шартли равишда озодликка чиқарилган, бироқ Шали тумани ички ишлар бўлими ходимлари томонидан ҳибсга олинган. Йигит Россиядан қочишга муваффақ бўлган ва федерал қидирувга берилган.
Изоҳ (0)