Россия Қора денгиздаги дон битимидан чиққанидан кейин АҚШ Украина, Туркия ва бошқа қатор давлатлар билан Украинанинг қишлоқ хўжалиги маҳсулотларини қандай экспорт қилиш вариантларини муҳокама қиляпти. Бу ҳақда Тhе Wаll Street Journal хабар берди.
Газетанинг ёзишича, Украина донини Дунай дарёси бўйлаб экспорт қилиш режаси кўриб чиқилмоқда. Унда октябрь ойигача дарё бўйлаб ҳар ойда тўрт миллион тонна қишлоқ хўжалиги маҳсулотларини ташиш кўзда тутилган.
Украина ғалласи дарё бўйлаб, шунингдек, Қора денгиз орқали Руминия портларига етказилади, у ердан эса бутун дунёдаги харидорларга жўнатилади.
Бундай йўналишда дон ташиш хавфсизлигини таъминлаш учун Қўшма Штатлар “барча эҳтимолий вариантлар, жумладан, ҳарбий ечимлар”ни кўриб чиқмоқда, дейилади WSJ хабарида.
Нашрнинг қайд этишича, Украинадан Дунай бўйлаб Руминия портлари орқали ғалла экспорт қилиш уни Қора денгизда ташишга қараганда кўпроқ вақт талаб этади ва қимматроққа тушади.
Аввал Украина ғалласи дон битими доирасида Қора денгиз портларидан экспорт қилинаётгани, бироқ 17 июль куни Россия келишувдаги шартлар бажарилмаётганини айтиб, шартномани узайтирмаслигини маълум қилди.
Изоҳ (0)