Россиянинг “Вагнер” хусусий ҳарбий компанияси раҳбари Евгений Пригожин олти ойдан кейин ё ўлади, ёки қайта исён бошлайди. Бундай прогнозни тадқиқотчи журналист Христо Грозев Financial Times газетасига берган интервьюсида айтиб ўтди.
“Путин телевидениега чиқди ва Пригожинни хоин деб атади. ‘Хоинлар’ни нима қилишларини ҳамма билади, лекин Путин ундай қилмади. У Пригожиннинг ўлигини кўрмоқчи. Ҳозирча бундай қила олмайди. Олти ойдан кейин Пригожин ё ўлади, ёки иккинчи тўнтариш бўлади”, — деди Грозев.
Тадқиқотчи Россия элитасининг бирор-бир қисми, ҳарбий-саноат комплексидан ташқари, Украинага қарши урушни тугатиш ташаббуси билан чиқмаслигига ишончи комил эканини айтди.
“Улар очиқчасига гапирмайди, чунки бу маҳбус дилеммаси. Улар биринчи ёки ягона бўлишни хоҳламайди”, — дейди Грозев.
Журналистнинг фикрича, Путин икки сценарийдан бирига кўра ағдарилиши мумкин.
“Ё маҳбус дилеммаси бартараф қилинади, ёки янада мувофиқлаштирилган тўнтариш орқали ундан халос бўлишади. Ҳозирча на олигархлар орасида, на вазирлар орасида, на ФХХда бу кузатилмаяпти. Аммо қолган элита Шимолий Корея каби музлатилган банк ҳисоблари билан яшашни истамайди. Бошқа ҳодисалар ҳам юз бериши мумкин, айтайлик, фронтдаги вазиятнинг ўзгариши”, — дея қўшимча қилди Грозев.
Пригожиннинг исёни
23—24 июнь кунлари Россияда “Вагнер” раҳбари Евгений Пригожин томонидан исён кўтаришга уриниш бўлди. У “Адолат марши”ни бошлаганини, унинг мақсади Москвага етиб бориш эканини айтди.
Қўзғолон пайтида Ростов-Дон ва Воронеж қўлга олинди, бир нечта вертолётлар ва ҳарбий самолётлар уриб туширилди, оқибатда камида ўн нафар рус ҳарбийси ўлди.
Путин Пригожинни давлатга хиёнатда айблади. Бироқ Беларусь раҳбари Александр Лукашенко билан музокаралардан сўнг Пригожин ўз жангариларининг Москвага юришини тўхтатди. “Вагнер” Беларусга кетадиган бўлди ва ҳозир Беларусда фаолият олиб бормоқда.
Изоҳ (0)