“Фронтда бўлаётган воқеалар шармандалик” — Пригожин “Вагнер”га мурожаат қилди 

“Вагнер” хусусий ҳарбий кампанияси раҳбари Евгений Пригожин Беларусга келган ёлланма аскарларга мурожаат қилди. Бу ҳақда Meduza хабар берди.

Пригожин мурожаатида улар муносиб курашгани ва “Россия учун кўп иш қилганини” таъкидлади.

“Ҳозир фронтда содир бўлаётган воқеалар шармандалик, унда иштирок этишимиз шарт эмас. Ўзимизни тўлиқ исботлай оладиган вақтни кутинг. Шунинг учун Беларусда бир муддат бўлишга қарор қилинди”, — дейди Пригожин.

Шунингдек, у “Вагнер” Беларусь армиясини “дунёнинг иккинчи армиясига айлантириши, агар керак бўлса, уларни ҳимоя қилишини билдирди. Пригожин ёлланма аскарлардан беларуслар уларни “нафақат қаҳрамонлар, балки ака-ука” сифатида ҳам кутиб олишганига эътибор қаратишни сўради.

“Дўконлардаги маҳаллий қизлар вагнерчилар келгани ҳақида пичирламоқда. Аммо эҳтиёт бўлинг, улардан ҳеч бирини хафа қилмаслик керак. Шунинг учун биз ҳам уларга биродардай муносабатда бўламиз”, — деди “Вагнер” раҳбари.

У “вагнерчилар”ни тайёр бўлишга, “даражасини” оширишга ва “янги йўлга, Африкага” чақирди.

“Эҳтимол, биз ўзимизни ва тажрибамизни шарманда қилишга мажбур бўлмаслигимизга амин бўлган пайт махсус ҳарбий операция зонасига қайтамиз”, — деди у.