Европада биринчи: Украинада 3D-принтер ёрдамида мактаб қурилмоқда (видео)

Украинанинг Львов вилоятида 3D принтер ёрдамида Европадаги биринчи мактаб қурилмоқда. Бу ҳақда UNIAN хабар берди.

Принтер ёрдамида аллақачон ишлаётган, лекин болалар учун тор бўлиб қолган янги мактаб биноси қад ростламоқда. Бинода 100 нафар бошланғич синф ўқувчиси таҳсил олиши режалаштирилган.

Украина рақамли трансформация вазири Михаил Федоров технология ресурслардан аниқроқ фойдаланиш ва материаллар нархини пасайтириш имконини беришини айтган. Босиб чиқариш аппаратини бошқариш учун бор-йўғи уч кишидан иборат жамоа керак бўлади.

Бу технология биринчи марта таълим муассасаси қурилишида қўлланилмоқда. Янги объект 500 квадрат метр майдонга эга бўлади ва 3D принтер ёрдамида қурилган дунёдаги энг катта бино бўлади.

Бундай қурилиш анъанавий қурилишга қараганда 20 фоиз арзон ва 10 баробар тезроқ. Вазирнинг сўзларига кўра, Украинани катта тикланиш кутмоқда, шунинг учун энди қурилишга технология ва инновацияларни жалб қилиш зарур.