АҚШнинг Нью-Жерси штатидаги футбол майдонида эркак кишини чақмоқ урган лаҳза видеога олинди. Бу ҳақда CBC News’га таяниб, “Zakon.kz” хабар берди.
Маълум қилинишича, тасвир хавфсизлик тизими томонидан видеога муҳрланган. 39 ёшли Эрик Баумгартнер момақалдироқ бўлганда, Вудбриж Тауншип шаҳарчасидаги футбол майдонида бўлган. У ўз ишни ёмғир бошлангунга қадар тугатмоқчи бўлган.
Шу пайт эркакни яшин урган, полиция зобити МакПартланд воқеа гувоҳи бўлган.
Полициячи воқеадан кейин майдонга бориб, эркакнинг юрагини массаж қилишни бошлаган.
“Биз унинг қўлларида куйиш излари борлигини кўрдик, шу орқали нима бўлганини аниқладик ва эркакнинг юраги қайта ишлаши учун уни массаж қилиш кераклигини англадик”, — дейди МакПартланд.
Унинг айтишича, Баумгартнер тез ёрдам машинасида касалхонага олиб кетилганидан кейин секин-аста тиклана бошлаган. Бу вақт давомида офицерлар у билан гаплашишга ҳаракат қилган.
Жароҳатланган эркакнинг дўстига кўра, Баумгартнер зарбанинг ўзи ҳақида ҳеч нарсани эсламайди.
“У ишлаётган пайтини ва тез ёрдам машинасида уйғонганини эслай олди, нима юз берганини эса эслолмади. Умид қиламизки, у ҳаётга қайтади”, — дейди жабрланувчининг дўсти.
АҚШ миллий океан ва атмосфера ассоциацияси маълумотларига кўра, мамлакатда ҳар йили 20 га яқин одам чақмоқ уриши оқибатида ҳалок бўлади, юзлаб одамлар жароҳатланади.
Изоҳ (0)