Наманганлик зиёратчиларнинг илк гуруҳи ҳаж сафарига йўл олди. Бу ҳақда “Дарё” мухбири Азизбек Абдувалиев хабар бермоқда.

Наманган халқаро аэропортида зиёратчиларни кутиб олиш учун пухта ҳозирлик кўрилди. Ёш йигитлардан иборат кўнгиллилар автобуслардан тушиб келаётганларни қарши олиб, уларнинг юкларини ичкарига олиб киришга кўмаклашди.

Бевосита аэропортнинг ўзида зиёратчиларнинг ҳужжатлари тезда расмийлаштириш учун барча хизматлар сафарбар этилди. Улар енгил тамадди қилиб олишлари учун егуликлар ҳозирланди.

Ҳаж сафарига йўл олган зиёратчиларни кузатишга Наманган вилояти ҳокими Шавкат Абдураззақов ҳам келди. У сафарга отланаётганларга оқ йўл тилаб, муқаддас манзилларда юрт осойишталиги ва равнақи учун дуода бўлишларини сўраб қолди.

Uzbekistan аирwайс авиакомпаниясининг Boeing 767 русумли ҳаво кемасида 245 нафар зиёратчи Наманган—Мадина йўналиши бўйича Саудия Арабистонига учиб кетди.

Маълумот учун, жорий йилги мавсумда Наманган вилоятидан 1,5 мингдан ортиқ киши ҳаж сафарига бориши кўзда тутилган.