Siemens Energy Ўзбекистонда электр станциялари қуради

Шавкат Мирзиёевнинг Германияга ташрифи давомида кўпгина соҳалар қатори энергетика тизими бўйича қатор келишувларга эришилди.

Хусусан, Германия—Ўзбекистон бизнес форуми доирасида “Иссиқлик электр станциялари” АЖ ва Siemens Energy ўртасида Бухоро шаҳар 3-сонли иссиқлик таъминоти қозонхонасида ва Муборак ИEМ корхонасида энергосамарадор газ турбинаси ўрнатиш бўйича иккита лойиҳа доирасида 72 млн евро миқдорида шартнома имзоланди.

Ўзбекистонда когенерация технологияларини жорий этиш йўналишида амалга оширилаётган ишларнинг узвий давоми сифатида баҳоланаётган мазкур лойиҳага кўра, Бухоро шаҳрининг 3-сонли иссиқлик таъминоти қозонхонасида ва Муборак ИEМ корхонасида ҳар бирининг қуввати 54 МВтга тенг бўлган иккитадан, жами 4 та газ турбина ўрнатилади.

Мазкур лойиҳаларнинг ишга туширилиши мамлакатимизда ишлаб чиқариладиган электр энергиясининг умумий қувватини 216 МВтга оширади. Дастлабки ҳисоб-китобларга кўра, бу йилига 1,7 млн кВт/соат электр энергияси ва 1,5 млн Гкал иссиқлик энергиясини ишлаб чиқариш имконини беради. Шунингдек, 80 та янги ишчи ўринлари яратилади. Лойиҳаларни амалга ошириш даврида, республикамизнинг минг нафар малакали мутахассисларини иш билан таъминлаш имконияти пайдо бўлади.