Олий суд раиси 87 та, бош прокурор ва ички ишлар вазири 47 тадан, вилоят ҳокими 93 та: Бўкадаги қабулда нечта муаммога жойида ечим топилгани маълум қилинди

Тошкент вилоятининг Бўка туманида Олий суд раиси, бош прокурор, ички ишлар вазири ҳамда вилоят ҳокими иштирокида катта сайёр қабул ташкил этилиб, қабул жараёнининг ўзида 274 та муаммога жойида ечим топилди. Бу ҳақда “Дарё”га республика ишчи гуруҳи ахборот хизмати хабар берди.

“Давлат раҳбари топшириғи асосида тузилган республика ишчи гуруҳининг Тошкент вилоятидаги фаолияти катта масштабдаги оммавий қабул билан бошланди. Бўканинг ‘Бўстон’ маҳалласидаги очиқ-жонли мулоқотлар майдонида президент Халқ қабулхоналари, Олий суд, Бош прокуратура, Ички ишлар вазирлиги, қўмиталар ва Тошкент вилояти секторлари раҳбарлари ҳар бир ариза-шикоятни синчиклаб кўриб чиқди”, — дейди ишчи гуруҳ ахборот хизмати масъули Мансур Абдусатторов.

Таъкидланишича, оммавий сайёр қабулда вилоятнинг Ўрта Чирчиқ, Юқори Чирчиқ, Қуйи Чирчиқ, Паркент, Олмалиқ, Пискент, Бекобод, Оққўрғон, Қибрай, Зангиота, Чиноз, Оҳангарон туманлари ва Нурафшон, Чирчиқ, Ангрен, Оҳангарон, Бекобод шаҳарларидан келган фуқаролар мурожаати ўрганилган.

“Мурожаатларнинг 52,2 фоизи суд, прокуратура ва ички ишлар фаолиятига оид масалаларни ташкил қилди. Олий суд раиси Б.Исломов томонидан 122 та мурожаат қабул қилиниб, 87 тасига жойида ижобий ечим топилган. 76 та мурожаат бўйича ўрганиш талаб этилгани сабабли назоратга олинган. Бош прокурор Н.Йўлдошев ва бош прокурор ўринбосари С.Артикова томонидан 160 нафар фуқаро қабул қилиниб, 47 та масала ижобий ҳал этилди. 113 та мурожаат бўйича ўрганиш талаб этилгани сабабли назоратга олинган. Ички ишлар вазири П.Бобожонов ва ИИВ ўринбосари Я.Абдулҳақов томонидан 102 нафар фуқаро қабул қилиниб, 47 таси ижобий ҳал этилди. 54 та мурожаат бўйича ўрганиш талаб этилгани сабабли назоратга олинди. Вилоят ҳокими З.Мирзаев томонидан 307 нафар фуқародан мурожаат қабул қилинган бўлиб, мурожаатларнинг 93 таси жойида ҳал этилган. 214 та мурожаат бўйича ўрганиш талаб этилгани сабабли назоратга олинган”, — дейилади ишчи гуруҳ ахборот хизмати берган маълумотда.

Қайд этилишича, бекободлик Сафарой Бердиева маҳалласидаги юз нафар хотин-қизни кооперацияга бириктириб, кийимлар тайёрлашини билдирар экан, бош прокурордан маҳсулотлар реализациясида амалий ёрдам сўраган. Мурожаатдан сўнг кооперация учун тез орада бозордан жой ажратиладиган бўлган. Ички ишлар вазирлиги масъуллари билан мулоқотдан сўнг 6 нафар собиқ ички ишлар ходими тизимга ишга тикланган. Тошкент вилояти ҳокимлиги маҳаллий бюджетидан бўкалик оғир ижтимоий аҳволдаги оилалар муаммоларини ҳал қилиш учун 721 миллион сўм маблағ ажратган.