Қашқадарё вилояти Қарши туманида икки машина тўқнашуви оқибатида икки киши ҳалок бўлди. Бу ҳақда вилоят Ички ишлар бошқармаси ахборот хизмати хабар берди.
Хабарга кўра, ҳолат 5 май куни соат тахминан 13:30 ларда давлат аҳамиятидаги 4Р-79 Қарши—Чим—Чироқчи—Шаҳрисабз автомобиль йўлининг 12-километрида содир бўлган. Қарши тумани “Хонобод” МФЙ ҳудудида ҳаракатланган ҳайдовчи Б.М. бошқарувида бўлган Nexia-3 ни Шаҳрисабз—Қарши йўналиши бўйича бошқариб келиб, қарама-қарши томондан ҳаракатланиб келаётган, Ж.А. бошқарувида бўлган Nexia-2 билан тўқнашиб, ЙТҲ содир этган.
Оқибатда Nexia-2 да йўловчи сифатида келаётган 2 нафар фуқаро тан жароҳати олиб, ҳодиса жойида вафот этган, бир нафари тан жароҳати олиб шифохонага тушган. Nexia-3 ҳайдовчиси тан жароҳати олиб шифохонага ётқизилган.
Мазкур ҳолат юзасидан вилоят ИИБ ҳузуридаги тергов бўлими томонидан Жиноят кодексининг 266-моддаси 3-қисми “а” банди билан жиноят иши қўзғатилган.
Изоҳ (0)