Франциянинг ядро энергетикасини Европа Иттифоқидаги “тоза технологиялар” рўйхатига киритиш истаги Германиянинг норозилигига сабаб бўлди, деб ёзмоқда Politico.
Нашрга аноним қолиш шарти билан икки дипломатнинг айтишича, Франция 23–24 март кунлари бўлиб ўтадиган Европа Иттифоқи саммити хулосаларида ЕИ саноатини декарбонизация қилишда атом энергиясининг муҳимлигини таъкидлашни истаган. Бу банд саммитнинг якуний ҳужжати лойиҳасига киритилмаган, аммо Париж буни талаб қилишда давом этмоқда.
Нашрнинг қайд этишича, ядро энергетикасининг аҳамияти ҳақидаги позиция Германия канцлери Олаф Шольц ҳукумати учун номақбулдир, ҳукумат таркибида, жумладан ядро энергетикасига шубҳа билан қарайдиган “Яшиллар” партияси бор. Европада экологик тоза технологиялар ишлаб чиқаришни сақлаб қолишга қаратилган қонун лойиҳасида ядро энергетикаси даражасини пасайтириш бўйича Берлиннинг Европа Комиссиясига қилаётган босими “айниқса Парижни ғазаблантирган”, дейди Politico манбалари.
Париж ва Берлин ўртасидаги келишмовчиликнинг иккинчи жиҳати автомобиль двигателлари эди. Март ойи бошида Германия кичик иттифоқдошлар гуруҳи, жумладан, Италия билан биргаликда Европа Иттифоқининг 2035 йилгача анъанавий двигателли автомобиллар сотилишини тақиқлаш тўғрисидаги қарорини блоклаб қўйди ва бу “жанжал”га олиб келди, деб ёзади нашр. Берлин ўзининг автомобилсозлик саноати манфаати учун қазиб олинадиган ёнилғи ўрнига синтетик ёнилғи ишлатиш вариантини лойиҳадан чиқариб ташлашни талаб қилмоқда, бироқ Европа парламенти унинг илтимосини икки марта рад этган. Бу талаб Франциянинг кескин танқидига сабаб бўлган.
Изоҳ (0)