Собиқ “Жоним” гуруҳи хонандаси Азиза Насриддинова YouTube’нинг “Нозим Толипов” каналига берган интервьюсида ҳаётидаги энг оғриқли нуқталар ҳақида сўзлаб берди. Хусусан, гуруҳ тарқалишига Шаҳзода сабабчи бўлгани, ижодий тақиқ қўйишгани ва шундан кейин Россияга бориб ошпазлик қилишга мажбур бўлгани ҳақида гапирди.
— Ижодимни анча эрта 7 ёшимдан бошлаганман. “Пахтаой” гуруҳи билан кўплаб халқаро танлов ва фестивалларда иштирок этганман. Вагиф Зокиров билан бирга ижод қилардик. Хусусан Шаҳзода билан танишишимга ҳам у сабабчи бўлган. Яъни Шаҳзода унинг турмуш ўртоғи билан синфдош дугона бўлган. Мен Вагиф Зокировнинг уйига репитиция қилиш учун борганимда, у гуруҳ тузиш таклифини берган. Вагифнинг таклифидан ҳайрон бўлиб ким билан гуруҳ тузамиз деганимда Нателла ва Зилолани айтган. “Гуруҳ тузиш менга керакми йўқми” деб анча иккиланганман. Кейин майли керакдир деб рози бўлганман. Нателла Вагифнинг аёли эди, у оранжировка учун пул тўламасди, асосий ҳаражатларни эса мен қоплаганман. Зилола Мусаеванинг онаси ҳам унга пул масаласида ёрдам берган. Хуллас, “Жоним” гуруҳининг қўшиқларини ўз пулимиз эвазига яратганмиз. “Тарона рекордс”дан умуман ёрдам олмаганмиз. У фақатгина кассета, концерт ва радиода қўшиқларимиз бериб борилишига ёрдам беришган. У пайтда санъаткорлар анча кам эди. Ким яхши қўшиқ яраца, клипсиз ҳам машҳурликка эришиш мумкин эди. 2000 йил “Тарона тақдимоти”да “Ўтиб кетади” қўшиғи билан саҳнага чиққанмиз. Аслида гуруҳ номи ҳам продюссерлик компаниясига тегишли эмас. Бу номли Вагиф Зокиров қўйган, — дейди хонанда Азиза Насриддинова.
Хонанда гуруҳнинг тарқатилиши унга оғир зарба бўлгани, ўз қўшиқларини куйлашдан маҳрум этилгани ҳақида гапириб ўтди.
— Гуруҳнинг тарқатилишига Зилола Мусаева сабабчи бўлган. “Қарама кўзларимга” қўшиғи “ҳит” бўлганидан кейин 2001 йилнинг 1 январь куни бир дугонам қўнғироқ қилиб “Тинчликми? Нега бундай қилаяпсан? Таниқли гуруҳ бўлганди-ку” деб сўраган. Кейин билсам улар радиога яккахон хонанда бўлиб гуруҳни тарк этганим ҳақида интервью беришган экан. Бу хабарни эшитиб “шок” ҳолатига тушдим. Бунинг сабабини сўрасам кулиб “Бу ҳаёт” деб жавоб беришган. У пайтлари ёш қиз эдим, шартномани аниқ ўқимай қўл қўйганман. Хуллас, гуруҳнинг барча муаллиф қўшиқлари, номи компанияга тегишли деган банди бор экан. “Аҳир қўшиқларнинг яратилишига пулни мен тикканман-ку”, деб сўраганимда “Бу ҳаёт”, деб кулиб жавоб беришган.
Тўғри тушунаман, продюссерлик компаниялари истеъдодли бўлган хонандаларга пул тикади, шу орқали фойда олади. Зиёда, Ойбек Нигора, “Божалар” ҳам продюссерлик компанияси орқали “кўтарилишган”. Аммо шартнома муддати тугагач, қўшиқ, клип ва саҳна либослари ҳам уларнинг ўзида қолган. Мана бу ҳақиқий мардлик. Бизда эса ҳамма нарсани ўзларида олиб қолиб, қўпол қилиб айтганда ялонғоч ҳайдаб солишган. Ўз пулим эвазига яратилган қўшиқларни ҳам айтиш ҳуқуқидан маҳрум қилишди. “Айтсанг жарима тўлайсан”, дейишганидан кейин жуда ёмон аҳволга тушганман.
“Жоним” гуруҳидан кейин иккита альбом ёздим. Аммо уларни оммага чиқариш имкони бўлмади. “Нега ишламагансиз, қўшиқларингизни эшитмаганмиз”, деб кўп сўрашади. Ҳамма ерга “запрет” қўйишганидан кейин қандай қилиб ишлайман. Шоира Отабекова ва “Сетора” гуруҳи ҳам худди шундай вазиятга тушган.
Мана шу воқеадан кейин 3-4 ой ўзимга келолмай, кўчага ҳам чиқмай қўйдим. Шу вазиятда бастакор Шаҳнознинг ёрдами катта бўлди. Ичимдаги дардларим асосида қўшиқлар яратиб берди.
Ўша вазиятда концерт ёки радиога борсам “Узр, сизни чиқаролмаймиз, ишдан кетгимиз келмаяпти”, деб тушунтиришади. Лицензия бор, қўшиқ бор ва оммага чиқишга рухсат бўлмаган, — дейди хонанда Азиза Насриддинова.
Хонанда Шаҳзода билан танишганида у оддий қиз бўлгани ва кейинчалик бирдан ўзгариб кетгани ҳақида ҳам айтиб ўтди.
— Шаҳзода билан танишганимда у оддий, ҳеч нарсаси йўқ қиз эди. У ўша пайтда Фарғонадан энди Тошкентга келганди. Бошида биз унга анчагина ёрдам берганмиз. Кийим-кечакдан опаси ёрдам қилганди. “Кўрмаганнинг кўргани қурсин” деб бекорга айтишмас экан. У учун пул биринчи ўринда бўлиб қолди. Ўзининг мақсадига етди. Шаҳзода танлаган йўл билан ижод қилишни тасаввур қилолмайман. Ҳар бир инсоннинг ўз йўли бор. Мен озод инсон бўлишни, ярим кечаси соат 1-2 да қўнғироқ қилиб “Фалон жойга бориб қўшиқ айт” дейишларини ҳазм қилолмайман, — дейди хонанда.
Азиза Насриддинова тақиқларга учрагач, Россияга бориб ошпазлик қилишга мажбур бўлгани ҳақида ҳам сўзлаб берди.
— Баъзи инсонлар бундай вазиятда тушкунликка тушиб, синиб қолишади. Мен эса қизларим учун ҳам ўзимни қўлга олдим. Яширмайман, ошпазлик бўйича ўқиб, Россиядаги ресторанда ҳам ишлаганман. У ерда ҳам таниб, нега бундай иш қилаётганимни кўп сўрашарди. Ундан кейин шифтга ойна ёки пластмасга гул туширишни ҳам ўрганганман. Ҳозир ҳам овқат тайёрлаш, қандолатчилик билан шуғулланиш қўлимдан келади. Ундан кейин икки йил банкда ишладим. Ҳозир моддий аҳволимиз анча яхшиланган. Онам катта ёшга кирган бўлса-да, ҳалигача ишлайди. У иқтисод фанлари бўйича профессор, катта қизим эса блогерлик билан шуғулланяпти. Хуллас, уччаламиз топган пулимизни бир ерга жамғариб яшаб келяпмиз, — дейди хонанда.
Эслатиб ўтамиз, “Жоним” гуруҳи 1999 йилда ташкил топган. Азиза Насриддинова гуруҳдан кетгач, ўрнини Нателла эгаллайди. 2001 йили гуруҳни Шаҳзода ҳам тарк этиб, яккахон ижодини бошлайди. Гуруҳ ижросидаги “Ўтиб кетади” ва “Қарама кўзларимга” қўшиқлари “ҳит” даражага эришган.
Изоҳ (0)