Суперлига. “Пахтакор” сафарда “Нефтчи”га ютқазиб қўйди ва ўз тарихида илк бор мавсумни кетма-кет иккита мағлубият билан бошлади

Футбол бўйича Ўзбекистон Суперлигасининг 2-турида “Пахтакор” 10 март, жума куни “Нефтчи” меҳмони бўлди.

Учрашувнинг биринчи бўлимида дарвозалар дахлсиз қолди. Иккинчи бўлим бошида Олексей Ларин собиқ жамоаси дарвозасини ишғол қилиб, фарғоналикларни олдинга олиб чиқди.

82-дақиқада Тома Табатадзе пенальтини муваффақиятли ижро этган ҳолда орадаги фарқни оширди. Ҳакам томонидан қўшиб берилган вақтда Достон Турсунов ҳисобни қисқартирди.

Шу тариқа “Пахтакор” ўз тарихида илк бор мавсумни кетма-кет иккита мағлубият билан бошлади. 1-турда “шерлар” “Олимпик” клубига ютқазиб қўйганди. “Нефтчи” эса очколарини 6 тага етказиб, мусобақа жадвалида пешқадамга айланди.

Суперлига

2-тур баҳси

10 март, жума

“Нефтчи” — “Пахтакор” 2:1

Голлар: 1:0 – 52 Ларин, 2:0 – 82, пенальти Табатадзе, 2:1 – 90+9 Турсунов.

“Нефтчи”: 45.Акбар Тўраев, 2.Зоир Жўрабоев, 7.Умар Адҳамзода, 8.Нурилло Тўхтасинов, 9.Улуғбек Ҳошимов (5.Юрий Батюшин, 83), 19.Мирзоҳид Ғофуров (35.Мурод Бобожонов, 90+4), 21.Муҳсин Убайдуллаев, 22.Тома Табатадзе (70.Аббос Ғуломов, 90+4), 23.Диёр Туропов (11.Иззатилла Абдуллаев, 83), 24.Ғулом Ҳайдар Ғуломов, 26.Олексей Ларин.

“Пахтакор”: 35.Санжар Қувватов, 3.Ҳожиакбар Алижонов, 4.Достон Турсунов, 88.Шаҳзод Азмиддинов, 34.Фаррух Сайфиев, 7.Одил Ҳамробеков, 27.Сардор Собирхўжаев, 17.Достон Ҳамдамов, 9.Сардор Рашидов (28.Диёр Холматов, 61), 8.Азиз Турғунбоев (15.Гиорги Папава, 75), 10.Драган Черан.

Огоҳлантиришлар: Ҳошимов (18), Ҳамробеков (80), Папава (85).