Ўзбекистон ташқи ишлар вазири ўринбосари Ғайрат Фозилов 7 март куни Буюк Британия ташқи ишлар вазири ўринбосари Лео Докерти билан видеоконференцалоқа орқали учрашув ўтказди. Бу ҳақда TIV матбуот хизмати хабар берди.
Қайд этилишича, мулоқот чоғида 2022 йил декабрь ойида бўлиб ўтган икки томонлама сиёсий маслаҳатлашувларда эришилган келишувларни амалга ошириш бўйича Ўзбекистон ва Буюк Британия ўртасидаги ҳамкорликнинг бугунги ҳолати ва истиқболлари муҳокама қилинган.
Шунингдек, савдо-иқтисодий, инвестициявий, маданий-гуманитар ва бошқа соҳаларда алоқаларни янада ривожлантириш юзасидан фикр алмашилган.
“Томонлар Ўзбекистон—Буюк Британия муносабатларини кенгайтириш йўлида жадал саъй-ҳаракатларни амалга оширишга келишиб олдилар”, — дейилади хабарда.
Эслатиб ўтамиз, декабрь бошида Ғайрат Фозилов Ўзбекистон—Буюк Британия савдо ва саноат кенгашининг 26-йиғилишида иштирок этиш доирасида мамлакатга ташриф буюрган Буюк Британиянинг Шарқий Европа ва Марказий Осиёдаги савдо бўйича комиссари Кенан Полео ҳамда Халқаро савдо вазирлиги бош директори Эндрю Митчелл билан учрашганди. Ўшанда томонлар ўзаро товар айирбошлашни янада кенгайтириш, Ўзбекистон иқтисодиётига тўғридан тўғри Британия сармоялари ва илғор технологияларни жалб этишга тайёрлигини билдирганди.
Изоҳ (0)