O‘zbekiston tashqi ishlar vaziri o‘rinbosari G‘ayrat Fozilov 7-mart kuni Buyuk Britaniya tashqi ishlar vaziri o‘rinbosari Leo Dokerti bilan videokonferensaloqa orqali uchrashuv o’tkazdi. Bu haqda TIV matbuot xizmati xabar berdi.
Qayd etilishicha, muloqot chog’ida 2022-yil dekabr oyida bo‘lib o‘tgan ikki tomonlama siyosiy maslahatlashuvlarda erishilgan kelishuvlarni amalga oshirish bo‘yicha O‘zbekiston va Buyuk Britaniya o‘rtasidagi hamkorlikning bugungi holati va istiqbollari muhokama qilingan.
Shuningdek, savdo-iqtisodiy, investitsiyaviy, madaniy-gumanitar va boshqa sohalarda aloqalarni yanada rivojlantirish yuzasidan fikr almashilgan.
“Tomonlar O‘zbekiston—Buyuk Britaniya munosabatlarini kengaytirish yo’lida jadal saʼy-harakatlarni amalga oshirishga kelishib oldilar”, — deyiladi xabarda.
Eslatib o‘tamiz, dekabr boshida G‘ayrat Fozilov O‘zbekiston—Buyuk Britaniya savdo va sanoat kengashining 26-yig‘ilishida ishtirok etish doirasida mamlakatga tashrif buyurgan Buyuk Britaniyaning Sharqiy Yevropa va Markaziy Osiyodagi savdo bo‘yicha komissari Kenan Poleo hamda Xalqaro savdo vazirligi bosh direktori Endryu Mitchell bilan uchrashgandi. O‘shanda tomonlar o‘zaro tovar ayirboshlashni yanada kengaytirish, O‘zbekiston iqtisodiyotiga to‘g‘ridan to‘g‘ri Britaniya sarmoyalari va ilg‘or texnologiyalarni jalb etishga tayyorligini bildirilgandi.
Izoh (0)