Ҳоким кўчат экди, вазир сув қуйди: Тошкент вилоятида вазир ва ҳоким кўчат экиш бўйича мастер-класс ўтиб берди (видео)

Тошкент вилоятининг Нурафшон шаҳрида Табиат ресурслари вазири Азиз Абдуҳакимов ва ҳоким Зоир Мирзаев “Яшил макон” умуммиллий лойиҳаси иштирокчиларига кўчат экиш бўйича мастер-класс ўтиб берди. Бу ҳақда жараённи кузатган “Дарё” мухбири хабар берди.

Маълум қилинишича, Тошкент вилоятида “Яшил макон” умуммиллий лойиҳасининг баҳорги мавсумига старт берилган.

“Нурафшон шаҳрининг ‘Янги Ўзбекистон’ боғида 24 гектар ер майдонига кўчат экиш тадбири бўлиб ўтмоқда. Мазкур акцияда республика ва вилоятдаги корхона-ташкилот ходимлари раҳбарлари, масъуллар, нуронийлар, маҳалла фаоллари, депутатлар, ёшлардан иборат 2000 дан ортиқ иштирокчилар 1000 тупдан ортиқ манзарали ҳамда мевали дарахт кўчатларини экишади”, — дейди вилоят ҳокимлиги ахборот хизмати раҳбари Беҳзод Қобулов.

Тошкент вилояти ҳокими Зоир Мирзаевнинг журналистларга маълумот беришича, Ўзбекистонда бошланган “Яшил макон” умумиллий лойиҳаси туркий давлатлар саммитида юқори баҳоланган ва қўллаб-қувватланган.

“Ўзбекистонда бошланган ‘Яшил макон’ умумиллий дастури туркий давлатлар саммитида 10 дан ортиқ давлат раҳбарлари томонидан эътироф этилди ва қўллаб-қувватланди. Туркия давлати ҳам дарахт экиб, табиат яшиллигини авайлаб асрашни бошлади. Марказий Осиё давлатлари ҳам бу ташаббусни қўллаб-қувватлаб, амалга оширяпти. Умуммиллий дастур сифатида бошланган ташаббус умумжаҳон дастурига айланиб бормоқда”, — дейди вилоят ҳокими ОАВ вакиллари билан суҳбатда.

Табиат ресурслари вазири Азиз Абдуҳакимовнинг айтишича, “Яшил макон” умуммиллий дастурининг Тошкент вилоятида ўзига хослиги бу вилоят ҳокимининг шахсий намуна бўлаётгани ҳисобланади.

“Мазкур лойиҳанинг Тошкент вилоятидаги муҳим жиҳати вилоят ҳокимининг шахсий намунаси бўлмоқда. Шу сабаб мен шахсан вилоят ҳокимига ташаккур изҳор қиламан ва ҳокимнинг шахсий намунаси вилоятдаги ташкилот ва корхона раҳбарлари ва фуқароларга туртки бўлади деб ишонаман. ‘Яшил макон’ умумиллий лойиҳасини амалга ошириш давомида фақат дарахт экиш эмас, ҳудуддаги ишлаб чиқарувчи корхоналар билан суҳбатлашиб, имкон қадар табиатга зарарни камайтириш керак. Биз бу борада вилоят ҳокими билан келишдик ва қилиниши лозим бўлган ишларни режалаштириб олдик”, — дейди Азиз Абдуҳакимов.

Вазирнинг маълумот беришича, Тошкент вилояти ҳамда Нурафшон шаҳрида ойида бир неча кун автомобилсиз кун лойиҳаси амалга оширилади.