Ҳиндистонлик эркак «Аватар-2» фильмини томоша қилаётиб, юрак хуружидан вафот этди

Ҳиндистоннинг Педдапурам шаҳрида бир эркак кинотеатрда «Аватар: Сув йўли» фильмини томоша қилиш чоғида юрак хуружидан вафот этди, деб хабар беради India Today.

Таъкидланишича, киносеанс ўртасида ҳиндистонликнинг мазаси қочган ва ҳушини йўқотган. У билан бирга кинотеатрда бўлган укаси зудлик билан уни касалхонага етказган, бироқ шифокорлар унинг ўлимини қайд этган, холос.

Нашр маълумотларига кўра, 2010 йилда Тайвандаги кинотеатрда «Аватар» фильмининг биринчи қисмини кўриш пайтида томошабинлардан бири вафот этган. У сюжет туфайли ортиқча асабийлашиб, қаҳрамонлар учун шунчалик қаттиқ ҳаяжонланганки, бунга юраги дош бера олмаган. 42 ёшли тайванлик вафот этган. Уни кўздан кечирган шифокор «фильм томоша қилиш натижасида қаттиқ ҳаяжонланиш» юрак хуружига сабаб бўлганини айтган.

«Аватар» фильмининг янги қисми биринчи фильми тақдим этилганидан 13 йил ўтиб кинотеатрларда намойиш этилмоқда. Фильмда актёр Сэм Уортингтон томонидан гавдалантирилган қаҳрамон Жейк Салли ва унинг оиласи доимий яшаш жойларини тарк этишга ва Пандора сайёрасининг аниқланмаган ҳудудларига боришга мажбур бўлади.

Шунингдек, кинокартинада  Зои Салдана, Сигурни Уивер, Кейт Уинслет, Стивен Лэнг, Мишель Йео ва бошқа машҳур актёрлар суратга тушган. Фильмнинг давомийлиги 3 соат-у 12 дақиқани ташкил қилади.