Twitter Американинг етакчи оммавий ахборот воситаларида ишлайдиган ўнлаб журналистларнинг аккаунтларини блоклаб қўйди. Бу ҳақда The Washington Post хабар бермоқда.
Қайд этилишича, The Washington Post журналистидан ташқари, The New York Times, CNN, Субstack ва бошқа бир қатор нашрлар мухбирларининг Twitter’даги саҳифалари блокланган.
Газетанинг ёзишича, чекловлар Twitter’нинг бошқа шахс жойлашувини унинг розилигисиз улашишни тақиқлаш ҳақидаги қарори билан боғлиқ.
Тахминларга кўра, блокланган журналистларнинг ҳар бири Илон Маск аввалроқ бизнесмен самолёти ҳаракати ҳақидаги маълумотларни чоп этишда айблаган Жек Суини ҳақидаги воқеани ёритган.
«Маскнинг ўзи бу тахминларни билвосита тасдиқлади. Журналистлар бошқалар каби доххинг қоидаларига бўйсунади», — деб ёзди у Twitter’да.
Доххинг бу — шахс ҳақидаги шахсий ёки махфий маълумотларни унинг розилигисиз қидириш ва нашр этиш.
CNN Twitter'нинг қарорини «ўйламасдан қабул қилинган асоссиз қарор» деб атади ва платформадаги беқарорлик ҳамда ўзгарувчанлик кучайиб бораётгани ҳақида гапирди.
«Биз Twitter'дан ҳаракатларимизни тушунтиришни сўрадик ва жавобга қараб, муносабатларимизни қайта кўриб чиқамиз,» — дейилади телеканал Twitter саҳифасида.
Кейинроқ Маск Twitter’да унинг жойлашувини кузатувчи ҳисобларни қачон блокдан чиқариш кераклиги ҳақида сўров ўтказди. Маск дастлабки сўровномада бир нечта вариантлар берилгани учун узр сўраб яна бир бор сўров ўтказди.
Тошкент вақти билан 16 декабрь куни соат 16:00 ҳолатига кўра, сўровномага овоз берганларнинг 59 фоизи блокировкани зудлик билан тугатиш, 41 фоизи бундай аккаунтларни етти кундан ортиқ тақиқлаб қўйиш тарафдори.
Forbes таъкидлашича, Маскнинг жойлашувини кузатган аккаунтлардан ташқари, бошқа миллиардерлар, жумладан Amazon асосчиси Жефф Безос ва Microsoft асосчиси Билл Гейтснинг самолётларини «кузатиб келган» саҳифалар ҳам блокланган.
Блоклашдан сўнг Twitter ўзининг хавфсизлик сиёсатини янгилагани ва реал вақтда бошқа одамларнинг жойлашувини кўрсатувчи твитларни олиб ташлашини маълум қилди.
Изоҳ (0)