2022 йилнинг ноябрь ойида банан нархлари октябрь ойига нисбатан, яъни бир ойда ўртача 3,3 фоизга ошган. Бу ҳақда Давлат статистика қўмитаси хабар бермоқда.
Маълумотларга кўра, банан нархлари йил бошидан буён ўртача 16,9 фоизга ошган.
Банан нархлари ўтган йилнинг мос даври билан солиштирилганда, яъни йиллик нисбатда ўртача 12,2 фоизга ошгани кузатилган.
Ошаётган нархлар Ўзбекистонда банан истеъмолига қандай таъсир кўрсатади?
Охирги уч ойда Ўзбекистонда бананнинг ўртача улгуржи нархи бир ярим баробар ошди ва жорий улгуржи нархлар ўтган йилги даражадан деярли учдан бир баравар юқори.
Нархларнинг бундай динамикаси Ўзбекистонда кетма-кет иккинчи йил кузатилаётган ушбу мева истеъмолининг юқори ўсиш суръатларини секинлаштириши мумкин, — дейди EastFruit таҳлилчилари.
Ўзбекистонда 2022 йил январь ойи бошидан август ойи охиригача бананнинг ўртача улгуржи нархи икки ҳафталик қисқа даврни ҳисобга олмаганда килограмми учун 14 минг сўмдан 18 минг сўмгача бўлган.
Бироқ сентябрь ойининг бошидан бери улгуржи банан нархлари динамикасида барқарор ўсиш тенденцияси шаклланди.
2022 йилнинг январь ойи бошидан октябрь ойи охиригача бўлган даврда мамлакатга 112,3 минг тонна банан импорт қилинган. Бу ўтган йилнинг шу даврига нисбатан 1,9 баробар кўп.
Лекин сўнгги уч ойда кузатилган динамика ва банан нархининг жорий даражаси Ўзбекистонда банан истеъмоли ўсиш суръатларининг сезиларли даражада пасайишига олиб келиши мумкин.
Изоҳ (0)