ФВВ Қамчиқ довонида ўқув машқлари ўтказилиши муносабати билан аҳолига мурожаат қилди

Қамчиқ довонида 16—17 декабрь кунлари қўмондонлик-штаб ўқув машқлари ўтказилади. Бу ҳақда Фавқулодда вазиятлар вазирлиги ахборот хизмати хабар берди.

Қайд этилишича, А-373 Тошкент—Ўш автомобиль йўлининг Қамчиқ довони қисмида Фавқулодда вазиятларнинг олдини олиш ва бундай вазиятларда ҳаракат қилиш давлат тизими (ФВДТ) бошқарув органлари ҳамда куч ва воситаларининг довон ҳудудида табиий, техноген хусусиятли фавқулодда вазиятлардан муҳофаза қилиш бўйича ҳаракатларига бағишланган ўқув машқлари бўлиб ўтади.

Мазкур ўқув машқларини ташкил қилишдан мақсад ФВДТ раҳбарлар таркиби куч ва воситаларининг фавқулодда вазиятларда тўғри ҳаракатланишга оид тайёргарлик даражасини ошириш, аҳолини фавқулодда вазиятлардан муҳофаза қилиш бўйича тадбирларнинг самарадорлигини оширишдан иборат.

Ўз навбатида, фуқароларимиздан мазкур ўқув машқларининг амалий жараёнларига оид материалларни нотўғри талқин қилмаслик, балки мавжуд маълумот ва ахборотлардан унумли ҳамда оқилона фойдаланишни сўраб қоламиз, — дейилади вазирлик баёнотида.

Мавзуга доир:

• «Қамчиқ» довонида фавқулодда вазиятларда «жабрланганлар» қутқарилди (фото)
• «Қамчиқ» довонида қўмондонлик – штаб ўқув машқи ўтказилди (фото)