Голливуднинг хорижий матбуот ассоциацияси расман «Олтин глобус» мукофотининг 2023 йилги номзодлари рўйхатини эълон қилди.
«Ҳамма нарса ҳамма жойда бир вақтнинг ўзида» кинокартинаси 2022 йилнинг энг машҳур, севимли лойиҳаларидан бирига айланди. Фильм бир вақтнинг ўзида мукофотнинг олтита йўналишида: учта актёр иши (Мишел Ео, Жейми Ли Кертис ва Ке Хьюи Куан), режиссёрлик ва сценарий учун (Дэниэл Кван, Дэниэл Шейнерт) номзодлар рўйхатига киритилди. Фильм, шунингдек, «Энг яхши комедия ва мусиқий фильм» номинацияси учун Демиен Шазелнинг «Вавилон», Мартин Макдонанинг «Инишериналик Банши», Райан Жонсоннинг «Шиша пиёз» фильми Канн кинофестивалининг ғолиби Рубен Эстлунднинг «Ғам учбурчаги» комедияси билан беллашади.
«Энг яхши драматик фильм» номинациясида Жеймс Кемероннинг «Аватар: Сув йўли», Баз Лурманнинг «Элвис», Стивен Спилбергнинг «Фабелманлар», Тодд Филднинг «Тар» ва Жозеф Косинскининг «Топ Ган: Меверик» фильмлари номзодлар қаторига киритилди.
«Энг яхши драматик сериал» йўналишида «Калмар ўйини», «Яхшиси, Соулга қўнғироқ қилинг», «Тож», «Аждарҳо уйи» ва «Озарк» ва «Ажратиш», комедиялар қаторида «Эбботт бошланғич мактаби», «Айиқ», «Уэнздай», «Бир бинодаги қотилликлар» ва «Айёрликлар» лойиҳалари номзод бўлди.
«Энг яхши драматик фильм актёри» номинациясида Остин Батлер («Элвис»), Брендан Фрэйзер («Кит»), Хью Жекман («Ўғил»), Билл Ниги («Тирик») ва Жереми Попе («Инспекция») номзод сифатида кўрсатилди. «Энг яхши драматик фильм актрисаси»: Кейт Бланшет («Тар»), Оливия Колман («Нур империяси»), Виола Дэвис («Жангчи малика»), Ана де Армас («Блондика») ва Мишел Уиллямс («Фабелманлар») «Олтин глобус» мукофотига номзодлари рўйхатига киритилди.
2022 йилнинг иккита энг йирик шоуси — «Оқ лотус: Сицилия» ва «Монстр: Жеффри Даҳмер ҳикояси» мини-сериаллар учун деярли барча тоифаларда бир-бири билан рақобатлашади. Иккаласи ҳам «Пем ва Томми» ва «Қора қуш» билан бир қаторда энг яхши шоулар номинациясига даъвогарлик қилади. «Оқ лотус» фильми юлдузлари Женнифер Кулидж, Обри Плаза ва Мюррей Абраҳам «Монстр: Жеффри Даҳмер ҳикояси» лойиҳаси актёрлари Эван Петерс, Ричард Женкинс ва Ниси Неш-Бетц каби «Энг яхши рол» номинациясига номзод сифатида тақдим этилди.
Маълумот учун, «Олтин глобус» мукофотининг 80-тақдирлаш маросими 2023 йилнинг 10 январь санасида бўлиб ўтади.
Изоҳ (0)