Бугун,

  • USD 11095.31
  • RUB 173.84
  • EUR 10772.44

Европа парламенти вице-президенти Ева Кайли қўлга олинди, бу ҳақда AFP ва Бельгиянинг Кнаcк портали хабар берди.

Ева Кайли

Ева Кайли
Фото: Getty Images

Кнаcк ёзишича, Кайли Форс кўрфази мамлакатларидан бири томонидан «Европа парламентининг иқтисодий ва сиёсий қарорларига таъсир ўтказиш» мақсадида берилган пора ҳақидаги иш бўйича сўроқ қилиниш учун ушланган, бу ҳақда Бельгия федерал прокуратурасида маълум қилишган. Кнаcк ва France24 маълумотларига кўра, гап айни пайтда футбол бўйича жаҳон чемпионатига мезбонлик қилаётган Қатар ҳақида бормоқда.

Кайлининг Брюсселдаги уйида тинтувлар олиб борилган. 9 декабрь куни France24 ушбу иш доирасида яна тўрт киши қўлга олингани ҳақида маълум қилганди. Бельгия прокуратураси айтишича, уларнинг барчаси Италия фуқаролари ёки асли келиб чиқиши италияликлар бўлган. Идора маълумотларига кўра, қўлга олинганлар пул ёки «қимматбаҳо совғалар» кўринишида поралар олган.

Қўлга олинганлар орасида италиялик социалист ва Европарламент собиқ аъзоси (2004 йилдан 2019 йилгача) борлиги айтилмоқда. Гап Антонио Пансери ҳақида бораётган бўлиши мумкин, унинг уйидан 500 минг евро нақд пул мусодара қилинган, тинтувлар натижасида турли шахслардан жами 600 минг евро олиб қўйилган.

Кайли Грециядан депутат бўлиб, у қонунчилик органининг 14 нафар вице-президентидан бири ва Яқин Шарқ билан алоқалар учун масъулдир.

2010 йилда Қатар футбол бўйича жаҳон чемпионатини ўтказиш ҳуқуқини қўлга киритгач, бу поралар эвазига амалга ошгани ҳақида хабарлар пайдо бўлганди. Ўша йилиёқ The Sunday Times ўз манбасига таяниб, Халқаро футбол федерацияси (ФИФА) ижроия қўмитасининг икки аъзоси Қатар аризасини қўллаб-қувватлаб овоз бериш эвазига пора олгани ҳақида маълум қилганди. Кейинроқ информатор, «Қатар-2022» ташкилий қўмитаси собиқ ходимаси Федра ал-Мажид ўз айбловларидан воз кечди, аммо кейинроқ буни ўз ҳаётидан хавфсирагани учун қилганини тан олди.

2017 йилда The Daily Telegraph Франция собиқ президенти Николя Саркози мукофот эвазига Қатарнинг ЖЧ учун аризасини илгари сургани ҳақида мамлакат прокуратураси гумон қилганини ёзганди. Беш йилдан кейин ФИФА раҳбари Йозеф Блаттер интервьюда Саркози ўша вақтдаги УЕФА (Европа футбол ассоциациялари иттифоқи) раҳбари Мишел Платинидан Қатар аризасини қўллаб-қувватлашни сўраганини айтди.

Изоҳ
Асосий янгиликлар
Дунё
Туркия ва Суриядаги зилзила нега ҳалокатли оқибатларга олиб келди?
Маҳаллий
“Қардошларимизга ҳамдардмиз”. Ўзбек жамоатчилиги Туркиядаги зилзилага муносабат билдирди
Маҳаллий
Шавкат Мирзиёев ҳарбий хизматга навбатдаги чақирув бўйича қарорни имзолади