Германия терма жамоаси футболчилари ЖЧ—2022 вақтида икки қутбга бўлинган

Германия терма жамоасининг ички муҳити ЖЧ—2022 вақтида жуда ёмон ҳолатда бўлган.

Спорт Bild нашрининг хабарига кўра, терма жамоа икки қутбга — «Бавария» футболчилари ва бошқаларга бўлинган. Ҳанси Фликнинг мюнхенликлар вакилларига бошқача муносабатда бўлиши можаронинг асосий сабаби бўлган. Флик терма жамоанинг барча аъзоларида яхши таассурот қолдира олмаган.

Японияга қарши 1-тур ўйинидан (1:2) олдин муаммолар бошланган. Мануэль Нойер ва Леон Горетцка талаби билан терма жамоа футболчилари мундиал ташкилотчиларига ўзига хос норозилик билдириш учун оғзини ёпган ҳолда расмга тушган. Бошқа футболчилар эса ҳар қандай сиёсий ҳаракатларда иштирок этишни истамаган.

Японияга қарши баҳсда футболчилар учун Фликнинг Горетцкани Илкай Гундўған ўрнига майдонга тушириш қарори тушунарсиз бўлган. Жамоа ичида бу қарор танқидларга сабаб бўлган. Гўёки бу ҳаракат Горетцка норози бўлмаслиги учун амалга оширилган. «Манчестер Сити» хавбеки эса бу қарордан ғазабланган.

Марк-Андре тер Штеген ва Кай Ҳаверцлар захира ўриндиғида кўп вақт ўтказганидан норози бўлган. Айниқса, «Барселона» посбони клубда муносиб ўйин кўрсатган бўлса ҳам имконият берилмаганидан жаҳли чиққан.

«Боруссия Д» ҳимоячиси Никлас Зюле (Флик даврида «Бавария»да ўйнаган) биринчи ўйиндаги қўпол хатоларига қарамасдан кейинги ўйинларда ҳам иштирок этди. Бу вақтда Нико Шлоттербекка имконият берилмади, Маттиас Гинтер эса бирорта ўйинда майдонга туширилмади.

Германия терма жамоаси E гуруҳида 4 очко билан 3-ўринни эгаллади ва мусобақани тарк этди.