Ўзбекистон ва Нидерландия IT, сунъий интеллект соҳаларида ҳамкорлик қилади

1 декабрь куни ЕХҲТ Вазирлар кенгашининг Польшадаги 29-йиғилиши доирасида Ўзбекистон ташқи ишлар вазири Владимир Норов Нидерландия Қироллиги ташқи ишлар вазири Вопке Хукстра билан учрашди. Бу ҳақда ТИВ ахборот хизмати хабар қилди.

Қайд этилишича, суҳбат аввалида ташқи идоралар раҳбарлари Ўзбекистон билан Нидерландия ўртасида дипломатик муносабатлар ўрнатилганининг 30 йиллиги (1992 йил 24 ноябрь) муносабати билан ўзаро табриклар алмашган.

Ўзаро товар айирбошлаш ҳажмини ошириш, Нидерландия капиталини Ўзбекистон иқтисодиётининг турли тармоқларига жалб этиш, қишлоқ хўжалиги, тўқимачилик, фармацевтика, IT ва сунъий интеллект соҳаларида қўшма лойиҳаларни амалга ошириш юзасидан аниқ чора-тадбирлар таҳлил қилинган.

Музокараларда минтақавий ва халқаро масалалар юзасидан ҳам фикр алмашилган. Бу борада томонлар Афғонистон бўйича мулоқотни давом эттиришдан манфаатдор эканини тасдиқлаган.

Шунингдек, вазирлар парламентлараро мулоқотни мустаҳкамлаш, маданий-гуманитар ва бошқа соҳалардаги ҳамкорликни фаоллаштириш масалаларини ҳам кўриб чиққан.