Тошкентда хизмат вазифасини бажараётган ИИБ ходими ўлдирилгани бўйича қўшимча маълумот берилди

Тошкентнинг Олмазор туманида хизмат вазифасини бажараётган профилактика инспектори ўлдириб кетилганди. «Дарё» мухбирининг маълум қилишича, ИИВ департамет бошлиғи ўринбосари Ҳамза Маҳсумов ҳолат юзасидан қўшимча маълумот берди.

«Ходим пичоқланиб ўлдирилган. Аёл киши инспекторга телефон қилиб, ‘Эрим мени ўлдирмоқчи’, деб айтган. Воқеа жойига инспектор борган вақтда аёлнинг эри ходимга икки марта пичоқ урган», — деган Ҳамза Маҳсумов.

Воқеа 30 ноябрь куни соат 00:50 ларда юз берганди. Олмазор тумани ИИО Фаолиятини мувофиқлаштириш бўлими профилактика инспектори катта лейтенант Н.Бобомуротов туманнинг «Ғалаба» маҳалласига тезкор чақирув бўйича етиб бориб, хизмат вазифасини бажараётган вақтида, муқаддам судланган, 1992 йилда туғилган фуқаро Б.З. ходимнинг ҳаётига тажовуз қилиб, воқеа жойидан яширинган.

Олиб борилган тезкор-қидирув тадбирлари натижасида ИИБ профилактика инспектори ҳаётига тажовуз қилган фуқаро қўлга олиниб, процессуал тартибда чора кўриш учун прокуратура органларига топширилди.

Ҳолат юзасидан Тошкент шаҳар прокуратураси томонидан Жиноят кодексининг 97-моддаси (қасддан одам ўлдириш) билан жиноят иши қўзғатилган.