Жиззахда отасининг отхонасини ёқиб юборган йигитга нисбатан жиноят иши қўзғатилди

Жиззах вилояти Шароф Рашидов туманида отхонага ўт қўйилиши оқибатида 17 бош той ўлгани ҳақида хабар берилганди. Бош прокуратуранинг «Дарё»га маълум қилишича, ҳолат юзасидан жиноят иши қўзғатилди.

Қайд этилишича, «Қанғли» маҳалла фуқаролар йиғинида истиқомат қилувчи С.А. туманнинг «Нурафшон» маҳалласида яшовчи отаси А.Ж.нинг «Ёйилма» маҳалласи ҳудудидаги отхона ҳамда у ердаги мол-мулкларини укаси А.С.га берганидан норози бўлган.

Шу сабабли мол-мулк нотўғри тақсимланди, деб ҳисоблаб, С.А. отхонага 1 литр бензин сепиб, ёқиб юборган. Ёнғин оқибатида отхонанинг ичида турган, хусусиятига кўра кўчар мулк турига кирувчи қуйидаги:

• бозор нархи жами 102 миллион сўм бўлган 17 бош 1—1,5 ёшли тойлар (1 бош тойнинг бозор нархи 6 млн сўмни ташкил қилади);
• бозор нархи жами 145 млн 700 минг сўм бўлган 4 700 дона беда пресс (1 дона беда пресснинг бозор нархи 31 минг сўмни ташкил қилади);
• кўчмас мулк турига кирувчи отхона биносининг том қисми ёниб кетиб, ўзганинг кўп миқдордаги мулкига зарар етказилган.

Мазкур ҳолат юзасидан Шароф Рашидов тумани ИИБ ТБ тергов гуруҳи суриштирувчиси Б.Ҳайитбоев томонидан С.А.га нисбатан Жиноят кодексининг 173-моддаси (мулкни қасддан нобуд қилиш ёки унга зарар етказиш) 2-қисми «в» банди билан жиноят иши қўзғатилиб, дастлабки тергов ҳаракатлари ўтказилмоқда.

Мавзуга доир:

• Тошкентдаги атир-упа дўконини ёқиб юборган шахс топилди
• Қашқадарёда тери заводи фаолиятидан норози фуқаро устига бензин сепиб, ўзини ёқиб юборди (видео)