Камерун терма жамоаси юлдузи Андре Онана мураббий билан келишмовчилик сабаб ЖЧ—2022 ни тарк этди

Камерун терма жамоаси дарвозабони Андре Онананинг ЖЧ—2022 даги иштироки якунига етди.

Cope нашрининг хабарига кўра, посбон бош мураббий Ригобер Сонг билан бўлиб ўтган можародан сўнг терма жамоа базасини тарк этишга қарор қилган.

Тактика бўйича қарашларнинг мос келмаганлиги футболчи ва мураббий ўртасидаги можаронинг келиб чиқишига сабаб бўлган. Онананинг таъкидлашича, мураббийнинг фикрлари унинг футбол ҳақидаги тушунчасидан йироқ. Бу суҳбат Андре ва Ригобер ўртасида кескинликни юзага келтирган.

Журналист Фабрицио Романонинг қўшимча қилишича, мураббий гуруҳ босқичининг 1-турида жарима майдони ташқарисида тўпга тегиниш бўйича дарвозабонлар орасида Жаҳон Чемпионати рекордини ўрнатган Онанадан «анъанавий» ўйин услубига кўпроқ эътибор қаратишни сўраган. Андре эса ўз услубини ўзгартиришни истамаган.

Мураббий Камеруннинг бошқа футболчилари олдида ўз обрўсини туширишни истамай, дарвозабонга Сербияга қарши ўйинда майдонга тушмаслигини айтган.

Камерун футбол федерацияси раҳбари Самюуэль Это’O футболчи ва мураббий ўртасидаги зиддиятни юмшатишга уринган, бироқ буни уддалай олмаган.

Шундан сўнг Онана терма жамоа базасини тарк этишга қарор қилган.