НАТОнинг 30 давлатидан 20 тасида Украинага юбориладиган қурол захиралари тугади — NYT

НАТОга аъзо 30 давлатдан 20 таси Украинага қурол жўнатиш учун ҳарбий ресурсларини сезиларли даражада тугатди, деди Шимолий Атлантика альянси вакили The New York Times нашрига.

Бироқ қолган давлатлар, айниқса Франция, Германия, Италия ва Нидерландия каби йирик иттифоқчилар ҳали ҳам муҳим қурол-яроғлар билан таъминлашга қодир, дея қўшимча қилди манба. НАТО шу вақтга қадар Украинага 40 миллиард долларлик қурол берган, бу сумма Франциянинг йиллик мудофаа бюджетига тенг.

Журналистлар билан суҳбатлашган экспертларнинг таъкидлашича, Украинадаги уруш жараёнида ҳар икки томон ҳам Иккинчи жаҳон урушидан кейинги мисли кўрилмаган даражада қурол ва ўқ-дориларни сарфламоқда, Ғарб эса бунга тайёр эмасди.

НАТО расмийлари Украинада фронтда қўлланаётган артиллерия миқдори ақл бовар қилмас даражада эканини айтди. Масалан, Афғонистонда НАТО кучлари кунига 300 та артиллерия ўқини отарди ва ҳаво ҳужумидан мудофаа ҳақида кўп ташвишланмасди. Аммо Украина Қуролли кучлари кунига минглаб ўқ узмоқда ва ҳанузгача Россия ракеталари ҳамда Эронда ишлаб чиқарилган дронлардан ҳимояланиш учун ҳаво мудофаа тизимларига катта эҳтиёж сезмоқда. «Украинадаги бир кун — Афғонистонда бир ой ёки ундан кўпроқ», — деди мудофаа бўйича эксперт ва НАТОнинг собиқ ёрдамчиси Камил Гранд NYT’га.

НАТОнинг юқори мартабали мулозими айтишича, ёзда украиналиклар Донбассда бир кунда 6-7 мингта, россияликлар эса 40-50 мингта артиллерия снарядларини ишлатган. Таққослаш учун: АҚШ ойига атиги 15 000 та снаряд ишлаб чиқаради.