«Манчестер Юнайтед» эгалари клубни сотишга тайёрликлари ҳақида маълум қилди.
Клуб матбуот хизмати «ривожланишнинг муқобил стратегиясини ўрганиш жараёни» бошланганини маълум қилди. Бу жараёнда «Манчестер Юнайтед» директорлар кенгаши клубга янги инвестиция жалб қилиш, клубни сотиш ёки бошқа келишувларга оид барча вариантларни кўриб чиқади.
Қайд этилишича, ушбу жараёнда клубни ривожлантиришга қаратилган бир нечта лойиҳа, хусусан, «Олд Траффорд»ни таъмирлаш, инфраструктурани яхшилаш ва тижоратга оид лойиҳаларни кўпайтириш кабилар муҳокама қилинади.
Шу билан бирга ушбу вазият қайсидир лойиҳанинг амалга оширилиши ёки «Манчестер Юнайтед»нинг сотиб юборилишини кафолатмаслиги айтилган.
Клуб Глейзерлар оиласига тегишли. Америкалик оила 2005 йилда 790 миллион фунт эвазига «Манчестер Юнайтед»ни сотиб олганди. Айни вақтда жамоанинг бозор нархи 1,81 миллиард фунтга тенг. Аввалроқ Глейзерлар клубни сотиш борасида 5 дан 9 миллиард фунтгача бўлган таклифларни кўриб чиқишга тайёрлиги хабар қилинганди.
Изоҳ (0)